Ж.Амгалан: Гэртээ тусгаарлагдсан иргэд баар саванд орсон, хүнтэй уулзсан зөрчил гаргалаа

ЦЕГ-ийн НХЖХОНАБХА-ны дарга, хурандаа Ж.Амгалан мэдээлэл өглөө.

Тэрбээр "Цагдаагийн байгууллагын 4800 гаруй албан хаагчид хамгаалалт, аюулгүй байдлыг сахиулж ажиллаж байна. 

21 хоногийн тусгаарлалтаас гараад гэртээ 14 хоног тусгаарлалтад байгаа иргэдийн хөдөлгөөн замбараагүй байна. Сүүлийн хоёр хоногт 28 иргэн урт болон богино хугацаагаар гэрийн тусгаарлалтаас гарч явсан, энд тэнд баар саванд орсон, хүнтэй  уулзсан зөрчил гаргаад байна. 

Гэрт тусгаарлагдаж байгаа иргэд эрсдэлтэй байгаа гэдгээ ухаараад, арай гэж эх орондоо ирчихээд бидний зохион байгуулж байгаа ажлыг хүндэтгэж үзмээр байна. 

Сонгууль, цар тахал гээд олон ажил давхцаж байхад мэргэжлийн байгууллагуудын хүн хүчний бололцоог хүндэтгэж үзмээр байна. 

Албан ёсны тусгаарлах байранд байхад өгсөн хаягандаа очихгүй өөр газар очоод байгаа маш их тохиолдол байна. Улаанбаатарт 804 иргэн, орон нутагт 95 иргэн гэртээ байгаа. Одоогоор 524 иргэн ямар нэг байдлаар хаягаа сольсон, хөдөлгөсөн мэдээ байна. Цаашид гэрийн тусгаарлалтад байгаа иргэдийг хаягнаас нь өөрчлөхгүй байх арга хэмжээ авахгүй бол болохгүй нь. Гэрийн тусгаарлалтад байгаа иргэд эрүүл болчихсон гэсэн үг биш. Маш эрсдэлтэй. 

Мөн Засгийн газрын 288-р тогтоолоор өндөржүүлсэн бэлэн байдлын хугацааг сунгаад сонгуулийн үед баримтлах журам гарсан. Үүний хүрээнд бүх нам, эвсэл, нэр дэвшигчдэд журам  хүргэх ажлыг өнөөдрөөс эхлэн зохион байгуулна. Та бүхэн чанд мөрдөж ажиллахад анхаарах хэрэгтэй байна. 

Цар тахлын аюулаас хамгаалж байгаа зүйл бол амны хаалт гэдгийг дэлхий даяараа хүлээн зөвшөөрсөн. Амны хаалтгүй сэлгүүцдэг, бага насны хүүхдүүдийг сагсны талбайд, тоглоомын талбайд амны хаалтгүй тоглуулж байна. Таны амь нас, эрүүл мэндийг амны хаалт аварч байгааг хатуу ойлгох хэрэгтэй. Халуун дулаан болоод хэцүү байгаа ч эрүүл мэндээс илүү зүйл гэж байхгүй" гэв.