Энэ удаагийн "ЖИНХЭНЭ ЖДҮ" буландаа үндэсний дээлийг өдөр тутам өмсөхөд биед эвтэйхэн, загварлаг болгон хэрэглээний шинэ түвшинд нэвтрүүлсэн “Ивээл” брэндийг онцолж байна.
Ивээл брэнд нь 2017 оны арванхоёрдугаар сард анхны загвараа танилцуулж байжээ. Анх хоёр, гуравхан оёдолчинтой үйлдвэрлэлээ эхлүүлж байсан ч гурван жилийн хугацаанд нэрийн барааны таван салбар дэлгүүрийг нээн амжилттай ажиллажээ. Тэд энэ амжилтаа хамт олны хүчтэй, хурдтай хөдөлмөрийн үр шим гэж үздэг. Ингээд "Ивээл" брэндийн ерөнхий менежер П.Энэрэлсүрэнгийн яриаг хүргэж байна.
-Үндэсний дээл хувцас урладаг маш олон газрууд байдаг. Жишээлбэл, “Ялгуун”, “Борголжин”, “Mayara” гэх мэт. Танай брэндийн эдгээрээс ялгарах онцлог юу вэ?
-Манайхыг үүсгэн байгуулагдсаны дараа маш олон брендүүд гарч ирсэн. Манай брэндийн онцлог бол өдөр тутам өмсөх боломжтой дээлний захыг шигтгээгээр чимэглэдэг. Энэхүү шигтгээнүүдийг үйлдвэрийн технологиор л хийх боломжтой байдаг. Ихэнх загвараа шигтгээгээр чимэглэн урладаг.
-Үндэсний дээл, хувцаснаас гадна өөр бүтээгдэхүүнүүд гаргадаг уу?
-Манайх үндэсний хувцаснаас гадна маш олон бүтээлүүд туршин хийж байгаа. “Covid-19” цар тахал дэгдсэн байгаа энэ үед "маск" гэх мэт жижиг хэрэглэгдэхүүнүүдийг ихээр нь үйлдвэрлэж байна. Саяхан “Гоо Ивээл” төслийн хүрээнд тэмдэглэлийн дэвтэр, толь, түлхүүрийн оосортой багц бүтээгдэхүүнүүдийг гаргасан. Энэхүү төслийг хэрэгжүүлэхийн тулд хоёр жилийн хугацааг зарцуулсан.
-2017 онд танайхтай төстэй бизнес эрхэлдэг, өрсөлдөгчид байсан уу. Зарим хүмүүс танайхыг анхдагч гэж ярьдаг?
-Цагаан сар, баяр наадмаар өмсдөг гоёлын торгоор хийсэн дээл урладаг газрууд их байсан. Гэхдээ манайх шиг үндэсний дээл, хувцсыг өдөр тутам хаана ч өмсөхөд биед эвтэйхэн материалаар урладаг газар маш ховор байлаа.
-2017 онд үйл ажиллагаагаа явуулж байсан түүхээсээ хуваалцвал, одоо хэчнээн хүнийг ажлын байраар хангасан бэ?
-Анх 2-3 оёдолчинтой үйл ажиллагаагаа эхлүүлсэн. Дээлнүүдээ маш цөөн тоогоор гаргадаг байсан. Хэдийгээр цөөн тоогоор гаргадаг байсан ч маш хурдан борлуулагддаг байлаа. Харин одоо 100 гаруй хүнийг ажлын байраар ханган ажиллаж байна. Мөн нэрийн барааны таван салбарыг нээсэн.
-Танай бүтээгдэхүүний хэрэглэгчдийн хандлагыг хэрхэн тодорхойлдог вэ?
-Цаг үе, загварын трендээс болж хүмүүсийн сонголт жил бүр өөрчлөгдөж байдаг. Үүнд маш сайн судалгаа хийж, хүмүүсийн сонирхол, трэнд өнгийг даган байнга хувьсан өөрчлөгдөж байдаг. Үүнийг дагаад бараа бүтээгдэхүүний эрэлт хүртэл харилцан адилгүй өөр байдаг.
-"Ивээл" брэнд гурван жилийн хугацаанд таван салбарыг нээжээ. Үүнд зөв маркетинг, сурталчилгаа нөлөөлсөн болов уу. Энэ талаар хуваалцвал?
-Ямар ч бизнесийн үйл ажиллагаанд маркетинг хамгийн чухал байдаг. Мөн зөв маркетингаас гадна манай баг хамт олон нэгдэж ажилласны үр шим юм. Бүгд хурд, хүчтэйгээр хамтран ажилласан нь өнөөдрийн өсөж дэвших үндсийг тавьсан байх.
Сэтгэгдэл бичих