ХӨСҮТ: 5 хүнээс коронавирус илэрсний нэг нь Орос жолооч

ЭМЯ-наас өдөр бүрийн 11:00 цагт өгдөг ээлжит мэдээллээ хийлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 2016 оронд коронавирусийн халдвар тархаж,  6.6 сая хүн өвчилж, 382 мянган хүн нас баржээ.  Одоогоор 3 сая эмчлэгдэж байгаа бол мөн тооны хүн эмнэлгээс гарчээ. Сүүлийн 24 цагт 120 гаруй мянган шинээр өвчилж, 15 мянган хүн нас баржээ. 

ОХУ-д 24 цагийн дотор 8831 хүн шинээ халдвар авсан. Мөн манай олон аймагтай хил залгадаг Буриад, Эрхүү, Чити, Тувад 39-138  тохиолдлоор нэмэгдсэн. Манай улсад 12 хүн ажиглалтад шинээр орж, 288 хүн ажиглалтаас гарч, гэрийн тусгаарлалтад шилжсэн. Одоогоор 1530 хүн ажиглалтад байна. Орон нутгийн 16 чиглэлийн галт тэргэнд 10 эмч ажиллаж, 5000 гаруй хүнд ажиглалт, шинжилгээ хийсэн, коронавирус илрээгүй байна. Гадаадаас 9 иргэн утасдаж, коронавирусийн талаар зөвлөгөө авчээ. Иргэдээс хүмүүс амны хаалт зүүх нь суларлаа гэдгийг анхааруулсан. 

Тиймээс иргэд амны хаалтаа зүүх хэрэгтэй байна. Манай хил залгаа олон оронд өвчлөл нэмэгдэж байгаа. Төдийлөн амны хаалт хэрэглэдэггүй байсан Англид хүртэл маск зүүхийг шаардаж эхэлсэн байна" хэмээлээ. 

ХӨСҮТ-ийн захирал Д.Нямхүү "2020 оны зургадугаар сарын 4-ний өдөр ХӨСҮТ-ийн хоёр, Зооноз өвчин судлалийн төвийн болон Дархан-Уул аймаг дахь салбар лабораторид  нийтдээ 715 хүний шинжилгээ хийсэн. Үүнээс 710-аас нь коронавирус илрээгүй.   5 хүнд нь коронавирус илэрсэн. 4 нь оюутан, нэг нь Оросын ачаа тээврийн жолооч. Энэ жолооч зургадугаар сарын 3-ны өдөр орж ирсэн, сэжигтэй тохиолдол гэж тооцож, тусгаарласан. Улмаар вирус илэрлээ. Өнөөдрөөс түүнийг ХӨСҮТ рүү татаж авчирч, эмчилгээг эхлэхээр болсон. Коронавирусээр өвчилсөн хүмүүсийн 80 хувь нь хойд хилээр орж ирж байгаа. Тиймээс хойд хөрштэй хил залгаа аймгуудын иргэд анхааралтай байх хэрэгтэй. Өнөөдөр 5 хүн эдгэрч, дараагийн шатны сувилал руу шилжсэн. Өвчилсөн тохиолдол 191, эдгэрсэн 70, одоо ХӨСҮТ-д 120 хүн эмчлүүлж байна. Эдгэрч гарсан 5 хүний хоёр нь оюутан, гурав нь 33-50 насныхан байна" хэмээлээ.