Н.Гантулга: 20 настайдаа “Голын цаана” шүлгээрээ би өөрийнхөө яруу найргийн мөн чанарыг тодорхойлсон

Үндэсний тэргүүлэгч www.zaluucom.mn сайт “Номын хавчуурга” утга зохиолын подкастынхаа тав дахь дугаарыг уншигч, сонсогч та бүхэнд толилуулж байна. Энэ удаагийн зочин “Болор цом”-ын эзэн яруу найрагч, сэтгүүлч  Норовын Гантулга.   Н.Гантулга ах намайг Утга зохиол, нийгмийн ажилтны дээд сургуульд 2004 онд элсэж ороход дөрөвдүгээр дамжааны оюутан байлаа.  Бүх л яруу найргийн наадамд түрүүлдэг, утга зохиолын хүрээнд аль хэдийнэ танил болчихсон байсан. “Голын цаана”, “Ижий минь байж” шүлгүүдийг нь уншиж, биширч явсан. Одоо ч гэсэн энэ хоёр шүлгийг нь Н.Гантулга гэдэг яруу найрагчийн нэрийн хуудас гэж бодож явдаг.

Тэрбээр 2013 онд “Уулсын сэтгэлгээний тэлэлтийг...” гэдэг шүлгээрээ “Болор цом”-ын эзэн болж байсан түүхтэй.  Харин 2008 онд “Дотоод орон зайн урсгал” яруу найргийн номоо анх гаргасан. 2014 онд “Бөхөн шарын тэмдэглэл” хөрөг нийтлэлийн ном. 2017 онд “Сэтгэлгээний шилэн хананд”, “Голын цаана” гэсэн хоёр яруу найргийн ном гаргаж байсан юм. Харин энэ жил “Өндөр их Алтайн оргилоос”  хөрөг нийтлэл, аян замын туурвилаа уншигчдын хүртээл болгоод удаагүй байна. 

“Болор цом”-ын эзэн яруу найрагч Н.Гантулгын оролцсон подкастын онцлох ишлэлүүд

-“Өндөр их Алтайн оргилоос” ном маань “Сэрүүн Галттай нутгаа сэтгэл сэнсэртэл санадаг Сэнгийн Эрдэнэ” гэдэг Эрдэнэ баавайн хөргөөр эхэлж байгаа. 

-Би дунд сургуулиа төгсөөд оюутан болж байхдаа 280 шүлэг цээжээр мэддэг байсан. 

-Гантулга өөрөө тамгаа дардаггүй, ард түмэн дардаг юм байна. Ард түмэн тамгаа “Голын цаана” гээд л дарчихаж байгаа байхгүй юу.

-Хөдөө орон нутаг гээд олон газар очиход “Голын цаана” шүлгээ уншаач гэж хүсдэг. Маш олон хүлээн авалтад уригдаж очиж байлаа. Тэр болгонд хүмүүс “Ижий минь” гэдэг шүлгийг чинь уншуулах гэж таныг урьж байгаа шүү” хэлж байсан. Энэ хоёр шүлэг миний нэрийн хуудас.

 2013 онд "Болор цом" наадам түрүүлсэн шүлгийг нь хүргэж байна 

Уулсын сэтгэлгээний тэлэлтийг...

Уулсын сэтгэлгээний тэлэлтийг би дотоод ахуйгаасаа мэдэрдэг
Уулсыг хэчнээн хайрлаж ижий шигээ, амраг бүсгүй шигээ санана
Уулс намайг яг л тэгж хайрлан толгод шигээ, хэдэн зууны өмнө
өврөөс нь алга болсон
Уусмал ягаан чулууд шигээ санана, зүрхнийхээ хөндүүр шиг л хүлээж авна

Уулсын сэтгэлгээний тэлэлтийг энэрэн хайрлахуйн цаг хугацаанаас мэдэрдэг
Эрх жаахан үр минь хүзүүнээс зүүгдэн шулганаад дээдийн жаргалыг амсдаг ч
Элэг зүрхний таталцлын гүүр-ганихралын дамжуурга модны үзүүрээс
Дэлхийн татах хүч шиг уулс ер бусаар соронздон, хацартаа энхрийлэн наадаг

Уулсын сэтгэлгээний тэлэлтийг омог барданамлын хөх дөлөн дундаас мэдэрдэг
Өөрөө өөрийгөө ч шатааж чадах эр зоригтоо эрдэн
энэхэн замбуулинд багтаж ядахад,
Өмнө минь мэхийсэн олон сөхөрсөн согоо шиг санагдан
хангайн буга шиг сэрвэлзэхэд
Өөрийн мэдэлгүй уулсын сүр хүчээр дутан жижигхээн толгодынх нь өвөрт
нялх янзага шиг бохирон унадаг даа

Уулсын сэтгэлгээний тэлэлтийг гоо сайхны хамгийн төгс илэрхийллээс мэдэрдэг
Эмзэг ялдам охидын арван долоохон нас сэтгэлийн зовлон болж
Эгчмэд хонгор бүсгүйн уяхан ааль, ер бусын бие галбир
нүдийг минь дахин цэлмээхэд
Цээжнийхээ гүнд уртаар санаа алдаад өнөө муу зүрх минь уулсын зүг хэдийнэ
алсарч оддог

Уулсын сэтгэлгээний тэлэлтийг яруу найргийнхаа эрчимлэг долгионоос мэдэрдэг
Хүмүүний ертөнцийг цагийн цагт гэрэлтүүлэн асааах ид шидийн наран бөмбөлөг
цээжинд минь байгааг
Хүслийн цэнхэрлиг огторгуйд оюун билгийнхээ даль жигүүрээр
судрын чуулган титэмлэж явааг уулс л мэдэрнэ
Цагийн буданд ч надаас өмнө мянга мянган жил найрагч нөхдийг минь
ингэж л мэдэрч байсан биз ээ
Уулсын сэтгэлгээний тэлэлтийг...

Яруу найрагч Н.Гантулгын нэрийн хуудас болсон "Голын цаана" 

Шаргал халиун буга урамдах нь сэтгэлд нэг л уйтай санагдаж

Шашир цацагтай тэнгэрийн хөшгийг ярья гэхэд голын цаана байна

Шаавай түргэн гүйдэлтэй салхи өвгөн зулайг нь илбэсэн

Шарга манхан уулсдаа намрын сардаа очъё гэхэд голын цаана байна

Дан тэрлэгтэй бүсгүй гэгээн мөрөөдлийг минь тунартал мишээхэд

Далд ертөнцийн цэцгийг тасдаж өгье гэтэл голын цаана байна

Хаа тэртээ дорно зүгээс давхисан бүгээн морьтой хүн

Хадган баринтагтай судар дэлгэж

Хөшөөтөд минь буусан ч голын цаана байна

Унахад минь тоссон газар шороо,

Арцын улаан хад

Уйлахад минь аргадсан эх дэлхийн наран, саран ч голын цаана байна

Улалзаж буй галын дөл бадарсан гүн харанхуй шөнөөр

Удган бөөгийн дуудлагыг чагнаж сууя гэхэд голын цаана байна

Сэтгэлээс минь мандсан нар сэтгэлд минь жаргадгийн учир

Сэвсгэр саарал үүлсийн чөлөөнд хүмүүс ирж буцдагийн учир

Энэ биенээс минь тасарсан бүхэн голын цаана байна

Энэ л бие рүү минь тэмүүлсэн болгон голын цаана байна

Багадаа дуудаж үсэг бүрийг нь цээжилсэн алтан хуудастай судар

Бараа нь үгүй аль хэдийнээ буцчихсан сахалтай буурал өвгөд голын цаана байна

Түүчээ тогоруудын цэн нулимсанд хулсан бийрээ дүрж

Түмэн оны заагт ганцхан шүлэг бичье гэхэд голын цаана байна

Хүмүүний амьдралын мөн чанар төрөх-үхэхийн саруул зам

 Хөл дор минь гишгэгдсэн өвсний зовлонтой дуу голын цаана байна

Голыг хэрхэн яаж гатлах цагаан бодол, гэрэлт зүүдэнд хөрвөөсөн

Голт эр чоно л харин голын наана байна