МЕТРО хот: Жолооч нар аа, голын усанд тээврийн хэрэгслээ бүү угаа

Гэр бүл, найз нөхөд, хамт олонтойгоо агаар салхинд гарч алжаалаа  тайлагсад Туул голын бүх л ай савыг эзэгнэн майхан, машинаа ярайтал зогсоосон дүр зургийг  олонтой харж байсан биз ээ.

Гэвч иргэд алжаал ядаргаагаа тайлаад буцхын оронд голын усанд машинаа бүтнээр нь оруулж зогсоочихоод,  үр хүүхэд, найз нөхдөөрөө нийлээд  угааж гарцгаадаг.  Саяхан экологийн цагдаагийн албаныхан Нийслэлийн нутаг дэвсгэр дээрх  Туул, Сэлбэ, Улиастайн гол орчимд хяналт, шалгалтаар ажиллахад голын эрэг буюу усны сан бүхий газарт иргэд тээврийн хэрэгслээ угааж, орчныг бохирдуулж байгаа 15 зөрчлийг таслан зогсоосноо мэдээлсэн билээ. Иргэдийг голын усанд машинаа угаахыг нь зогсоохын тулд торгууль, зөрчлийн арга хэмжээ авахаар болсон ч энэ үйлдэл давтагдсаар л байна.

Хүн бүр гол дотор машинаа угааж зогсох хэн нэгэнтэй таарсан байдаг. Гэвч бид тэднийг хараад л өнгөрдөг. Хэн нэгний хэрэгт хошуу дүрээд яахав гэдэг нь монголчуудын гэм биш, зан. Учир нь нийтээрээ хүлцэнгүй, хэтэрхий амин хувиа хичээсэн улс юм. “Би л машинаа голын усанд оруулж угаагаагүй бол болоо шүү дээ” гэх хандлага бидний дунд давамгайлдаг байх.  Голын наад талын эрэг дээр хүүхдүүдтэйгээ налайж суухад голын цаахна талд хэн нэгэн машинаа угааж л байна. Тэнд явж очоод эсвэл холоос ч гэсэн “Энд машинаа угааж болохгүй” гээд хэлчихдэг хүнтэй таарч байсан уу. Үгүй л болов уу.  Нийтээрээ бурууг дүлий мэт дуугуй өнгөрөөхийн оронд буруу үйлдлийн жигшиж, засаж залруулахыг хичээдэг байх хэрэгтэй. Энэ нь соёлт иргэний үүрэг мөн билээ. 

Голын усанд машинаа угааж хог хаях нь голын ай савыг бохирдуулах гол хүчин зүйл болдог. Хэдийгээр манайд голын усыг шууд цэвэршүүлэн хэрэглэх технологи нэвтрээгүй байгаа ч гэсэн нэг ундаргаас эх аван урсдаг голын уснаас маш олон ан амьтан ундаасдаг. Тээврийн хэрэгслийг голын усанд угаах үед техникийн тос, масло, бинзен шатахуун усанд  алдагдаж гол мөрний ай савыг бохирдуулах өндөр эрсдэлтэй шүү дээ.

Тиймээс нийт жолоочид, амрагчид минь үүнийг тунгаан аль болох машинаа голын эргээс хол байрлуулах хэрэгтэй. Хамгийн чухал нь голын усанд машин угаахгүй байх нь эх орныхоо чандмань эрдэнэ усыг хайрлан хамгаалахад оруулах том хувь нэмэр юм шүү.