Монгол хүн та яг одоо масктай байна уу

Монголчууд бид үнэхээр азтай. Дэлхий дахинаа тархсан аймшигт цар тахлыг дотооддоо алдаагүй цор ганц улс болчихоод байна. Гэвч энэ бүхэн цар тахлын эсрэг эрүүл мэнд, онцгой гэх мэт маш олон байгууллагын олон зуун ажилтны нөр их хөдөлмөр, хичээл зүтгэл, сэрэмж болгоомжийн үр дүн гэдгийг та бид ухаармаар байна. Монгол хүн коронавирус тусахгүй гэсэн муйхар бодлоосоо эрх биш салсан гэж найдна. 

Монголын хууль гурав хоног гэдэгтэй адил анх Франц иргэн коронавирусээр өвчилсөн нь нотлогдох үед бид хөл хорионы дэглэмээ яаж сахиж, ямар их айдастай байснаа одоо санаж байна уу. Гэтэл одоо дотооддоо алдаагүй ч гэсэн гаднаас зөөвөрлөгдөн орж ирсэн 220 халдвар манай улсад бүртгэгдэж, халдвар тархах магадлал нэмэгдсээр байхад бид яаж байна. Халууцаад байна гэх шалтгаанаар маск зүүхээ больж эхлэв. Эмч нар эдгээчихээд байгаа гээд коронавирусийг тоож ч үзэхээ болив. Өглөө бүр хэдэн мянгаараа хүлээн байж сонсдог байсан ЭМЯ-ны мэдээллийг ч сонсохоо болив. 

Дотоодын зах зээлүүд нээгдэж эхэлсэнтэй холбоотойгоор назгайрал хэрээс хэтрэв. Сонгуулиа ч хийчихлээ. Наадмаа ч хийхээр болчихлоо. Тэврэлдэж, үнсэлцэх бүр энүүхэнд олов. Бид энд ингэж жаргаж байхад дэлхийд юу болж байна гээч. 

Дэлхийн 216 оронд коронавирусийн халдвар тархаж,  11.5 сая хүн өвчилж, 536 мянган хүн нас барав. 24 цагийн дотор 165 мянган хүн шинээр халдвар авч, 3000 гаруй хүн нас барлаа. 24 цагийн хугацаанд АНУ 52, Бразилд 26, Энэтхэгт 23 мянган хүн шинээр халдвар авчээ. ОХУ-д сүүлийн 24 цагийн дотор 6736 хүн шинээр халдвар авч, 134 хүн нас барлаа. Нийт 536 мянган хүн нас барсан гээд бод доо. Ямар аймшигтай тоо вэ. Сошиал орчинд нүд хальтрам, элэг эмтрэм бичлэг, зураг хөвөрч байгааг харж байна уу. Эмнэлгийн коридороор дүүргэн хар гялгар уутанд хийж битүүмжилсэн цогцос хөглөрөөстэй.

Коронавирусын тахлын үед задгайрч дэглэмээ сулруулсан Казахстан хэдхэн хоногийн дотор жинхэнэ аймшигт нэрвэгджээ. Казахстанд нэг өдрийн дотор 1400 тохиолдол бүртгэгдэж, коронавирусын халдвар авсан хүний тоо 47 мянгыг давжээ. Олон хүн нас барж байна. Ард түмэн нь үнэxээр цөxөрч байна гэнэ. Тестлэx тест байxгүй, эмнэлэгт нь ор, аптект нь эм байxгүй, парацетомол ч олоxод xэцүү. Мооргууд нь ачааллаа дийлэxгүй аймшгийн дүр зураг тэнд байна гэнэ.

Монголчууд бид хэдүүлээ билээ. Бид хэнэггүйтэж, сэрэмж алдаж энэ муухай халдвар дотоодод маань тархвал юу болох бол. Төсөөлөхөд ч бэрх байна. Муу амлаж байгаа юм биш. Гэхдээ энэ аюулт цар тахлын эсрэг эм, вакцин гараагүй тохиолдолд хэзээ нэг цагт энэ өвчин манай улсын дотоодод алдагдана шүү гэдгийг ЭМЯ-ны мэдээллийн үеэр эмч мэргэжилтнүүд хэлсээр байгаа.

Үүнийг уншаад сууж байгаа монгол хүн та яг одоо масктай байна уу. Гараа ариутгасан уу. Гараа тогтмол угааж, гадуур сэлгүүцэхээ багасгасан уу. Цаг яагаа ч үгүй байна. Бид байтугай өндөр хөгжилтэй Солонгос, Америк, Орос, Хятад гэx мэт улсууд тахлын эсрэг яаж ч тэмцээд дийлэхгүй байгааг та бид бэлхнээ харж байна. Тиймээс таны хэнэггүйтэл улс орны, гуравхан сая ард түмний аюулгүй байдалд заналхийлж буйг ямагт санаж маскаа тогтмол зүүж, гараа тогтмол угаана уу.