А.Амбасэлмаа: Дахин нэг хүн эдгэрч, эдгэрсэн тохиолдол 33 боллоо

ЭМЯ-наас ээлжит мэдээллээ хийлээ. Энэ үеэр ЭМЯ-ны хэлтсийн дарга Д.Нарангэрэл хэлэхдээ "Дэлхийн 216 оронд халдвар бүртгэгдэж 5.4 сая хүн өвчилж, 346 мянган хүн нас барсан. 

24 цагийн дотор 88 мянган хүн шинээр өвчилж 22 мянган хүн нас барсан. Энэ нь өмнөх өдрөөс өвчлөл 5000 хүнээр, нас баралт 2000 хүнээр багассан сайхан мэдээ байна. 

ОХУ-д 24 цагийн дотор 8599 шинэ тохиолдол бүртгэгдсэн байна. Мөн Буриад, Эрхүү, Тува, Чит мужид нэмэгдсэн байна. 

Манай улсад зөөвөрлөгдөж орж ирсэн 141 тохиолдол бүртгэгдсэн. 32 хүн эмнэлгээс гарсан. 109 хүн эмчлүүлж байна. Өчигдөр орон нутгийн 15 чиглэлийн галт тэргэнд 5639 хүнд тандалт судалгаа хийсэн. Сэжигтэй тохиолдол илрээгүй. 

Одоогоор 1141 хүн ажиглалтад байна. 24 цагийн дотор 119 дугаарт 168 дуудлага ирж зөвлөгөө мэдээлэл авсан. Үйлчилгээний хүмүүс болох наймаачид амны хаалтаа зүүхгүй байна гэсэн  мэдээлэл их ирж байна. Тиймээс иргэд өөрсдөө болон худалдагчид амны хаалт зүүхийг анхааруулж байна. Мөн худалдагч нарт шаардлага тавьж амны хаалт зүүлгэхийг зөвлөж байна" гэлээ. 

ХӨСҮТ-ийн Тандалт судалгааны албаны дарга А.Амбасэлмаа: 

"Тавдугаар сарын 24 буюу өчигдөр ХӨСҮТ-ийн хоёр, Дархан-Уул аймгийн лабораторт 22 сорьцод шинжилгээ хийсэн. Коронавирус илрээгүй. Энэ нь тандалтын сорьц болон ачаа тээврийн жолооч нарын сорьц байсан. 

Өнөөдөр ХӨСҮТ-ээс нэг хүн эдгэрч дараагийн сувилал руу шилжиж байна. Ингээд эдгэрсэн хүн 33 боллоо. Эмчлэгдэж байгаа 108 байна. Эдгэрсэн хүмүүсээс одоогоор 19 нь сувилалд, 4 хүн гэртээ  гарсан. 10 хүн ажиглалт, тусгаарлалтын хугацаа дууссан. 

Өнөөдөр ХӨСҮТ-д 125 хүн байна. 108 нь эмчлүүлж байгаа. Үлдсэн 17 хүн нь ажиглалт, судалгаанд байгаа хүмүүс юм" гэлээ.