З.Энхболд: Сонгуулийн сурталчилгааны гэрээт ажилчдын машинд бензин хийж өгсөн

УИХ-ын сонгуулийн 22-р тойрог буюу Баянзүрх дүүрэгт АН-аас нэр дэвшигч З.Энхболд мэдээлэл хийлээ. 

Тэрбээр " Баянзүрхийн 22-р тойрогт Улаанбаатарын төдийгүй Монголын бүх худалдааны төв байдаг. Ажиллаж байгаа хүмүүс нь ихэнх нь манай тойргийн хүмүүс. Энэ хүмүүсийн гол асуудал нь зээлийн хүү байдаг. Өдрийн зээл авдаг хүмүүсийн дийлэнх нь энэ худалдааны төвүүд дээр байна. 

Юун гишүүдийн жилийн 3 хувийн хүүтэй зээлтэй харьцуулах. Бидэнд ирэх ёстой зээл замаасаа алга болж байна гэж энэ хүмүүс маш их уурлаж байна. 

Манай нам 39-өөс дээш суудал авах юм бол мөнгө  хүүлэгчидтэй тэмцэнэ, эсрэг хууль нэн даруй гаргана. Бид олонх болж ажлаа авбал наймдугаар сарын 1 хүртэл бүх төрлийн зээлийн хүүг нэг оронтой тоонд оруулж болно гэсэн тооцоо хийсэн. 

Хоёр жилийн өмнө С.Эрдэнэ дарга мөнгө хүүлэгчдийн эсрэг хууль санаачилсан. Одоо хүртэл МАН батлахгүй байгаа юм. МАН-ын олон хүн мөнгө хүүлэлтээр амьдардаг. Та бүхэн ХОМ-оос нь шууд мэдэж болно. 

Бид сонгуульд ялбал нийт ЖДҮ эрхлэгчид ямар нэг хязгааргүйгээр 3 хувийн хүүтэй зээл авах боломжтой болно гэж яриад яваад байгаа юм. АН ипотекийн зээлийн хүүг 5 хувь руу оруулсан. Түүнийг хүмүүс мартсан байдаг. Наймдугаар сарын нэгнээс хойш Монгол Улсад банк бусаас зээл авахгүй, өдрийн зээл авахгүй, албан ёсны банкнаас авдаг хөтөлбөрийг хоёр жилийн дотор хэрэгжүүлээд дуусна гэж бодож байгаа. 

УИХ-ын сонгуульд 608 хүн өрсөж байгаа. АН-ын 76 нэр дэвшигч зөвхөн МАН-ын 76-тай өрсөлдөхгүй байна. Цагдаа, тагнуулын байгууллагатай бас өрсөлдөж байна. Гэрээт ажилчдынхаа машинд  бензин хийж өгдөг юм. Бэлэн мөнгөний гүйлгээ огт байхгүй байхад санал худалдаж авч байна гээд байгаа. АН-ын нэг ч гишүүн санал худалдаж авах боломжгүй. Тийм мөнгө байхгүй. Машиндаа шатахуун хийж байгаа З.Энхболд мөнгө тараах боломжгүй. 

АН-ын гарах  магадлалтай Да.Ганболд, Б.Бямбасайхан, С.Баярцогт нарыг бариад хорьчихлоо. Одоогоор СЕХ нэг ч АН-ын нэр дэвшигчийг баривчлуулах зөвшөөрөл өгөөгүй. МАН-ынхан цагдаа, тагнуултай хуйвалдаж төрийн эрхийг хууль бусаар авах ажиллагаагаа зогсооё. 

Өмнө нь МАН 60 тэрбумын хэргээр төрийн эрхийг хуль бусаар авсан. Одоо хоёр дахь удаагаа Сонгуулийн хуулиа зөрчөөд хүчний байгууллагатайгаа хамтраад санал авч дэлхийд шившгээ хутгаж болохгүй шүү. Хууль хэрэгжих цаг ирнэ. Өнөөдрийнх шиг ийм замбараагүй байхгүй" гэв.