Өнгөрсөн хоёрдугаар сарын 17-нд "Эрдэнэс тавантолгой" компаниас хэвлэлийн хурал зарлаж, 1072 ширхэг хувьцаатай иргэдэд 96 мянган төгрөгийн ногдол ашиг хуваарилна хэмээн мэдэгдсэн байдаг. Үүнээс хойш иргэд 1072 хувьцааны ногдол ашгаа хүлээж, чих тавьсаар өдөр хоногийг өнгөрүүлж байна.
Иргэд уг нь тавдугаар сарын 1-ний өдрөөс эхлэн 1072 хувьцааны ногдол ашиг дансанд нь орж эхэлнэ хэмээн бодож байсан. Гэвч энэ нь ташаа ойлголт болохыг тавдугаар сарын 11-нд “Эрдэнэс Тавантолгой” ХК-ийн Хэвлэл мэдээлэл, Олон нийттэй харилцах хэлтсийн дарга М.Амарбаяр мэдээлсэн.
Тэрбээр "“Тавдугаар сарын 1-нээс хойш ногдол ашиг өгөх ажлыг зохион байгуулна хэмээх Төлөөлөн удирдах зөвлөлийн шийдвэр гарсан. Түүнээс биш тавдугаар сарын 1-нд ногдол ашгийг бүх хүний дансанд шилжүүлнэ гэж “Эрдэнэс-Тавантолгой” ХК-иас албан ёсоор мэдэгдээгүй. Одоогийн байдлаар 1.7 сая иргэн хувьцааны дансаа нээлгэсэн ч 425 мянган иргэн л банкны дансаа баталгаажуулсан байна. Бүртгэлийн асуудалгүй иргэдийн ногдол ашгийг өмнөх долоо хоногт Үнэт цаасны төвлөрсөн хадгаламжийн төв /ҮЦТХТ/-ийн дансанд шилжүүлсэн" хэмээн мэдэгдэж байсан юм.
Түүнээс хойш дахин сар гаруйн хугацаа өнгөрсөн ч хувьцааны ногдол ашгийн сураг гарсангүй. Тиймээс бид энэ талаар "Эрдэнэс тавантолгой" компанийн “Эрдэнэс Тавантолгой- 1072 хувьцаа” мэдээллийн төвийн менежер Э.Баатарцогтоос тодруулахад, " Хувьцааны ногдол ашиг шилжүүлэх асуудлыг одоо бид мэдэхгүй. Эхний ээлжийн ногдол ашгийг Үнэт цаасны төвлөрсөн хадгаламжийн төв рүү манайхаас шилжүүлсэн. Иргэдийн данс руу хэзээ шилжүүлэхийг Сангийн яам, Үнэт цаасны төвлөрсөн хадгаламжийн төв мэднэ. Манайх хуулиараа гэрээнийхээ дагуу ногдол ашгаа шилжүүлчихсэн. Одоо иргэдийн данс руу шилжүүлэх ажиллагаа үлдсэн гэсэн үг. Энэ асуудлыг сонгуулийн дараа шийдэх юм шиг байна билээ. Одоо хоёр гурав хоноод сонгууль болох гэж байгаа учраас иргэдийн данс руу шилжүүлж амжихгүй байх” гэв.
Харин Сангийн яамнаас энэ талаар тодруулахад “Хувьцааны ногдол ашиг хуваарилах, иргэдийн данс руу шилжүүлэх асуудлыг Сангийн яам мэдэхгүй. “Эрдэнэс тавантолгой” хувьцаат компани өөрсдийн дүрмийн дагуу мөнгө төгрөгөө зохицуулах ёстой. Сангийн яамтай харьцах ёсгүй. Өөрсдийнхөө дүрмээр зохицуулж, иргэдийн данс руу хуваарилна” гэх мэдээлэл өглөө. Түүнчлэн Үнэт цаасны төвлөрсөн хадгаламжийн төвийн холбогдох дугаарууд руу холбогдож тодруулах гэсэн боловч утсаа авсангүй.
Албаны хүмүүсийн мэдээлснээр энэ ажилд "Эрдэнэс Тавантолгой" ХК-иас гадна Үнэт цаасны төвлөрсөн хадгаламжийн төв, арилжааны банк, НӨАТ систем, Улсын бүртгэл гэх мэт байгууллагуудтай хамтран иргэн бүрийн мэдээллийг нягталж хянаж буй. Мөн банкинд данстай эсэхийг нь шүүх, тухайн данс нь е-баримт дээр байгаа эсэхийг хянах, нэрсийг нь шивээд арилжааны банкууд руу, банк нь Монголбанк руу, Монголбанк эргүүлээд Төрийн сан руу явуулах зэрэг олон ажил шат дараатайгаар хийгдэж байгааг дуулгаж байсан. Энэ болгоныг цэгцлэх ажлыг холбогдох байгууллагууд хийж байгааг ойлгоорой гэсэн. Гэхдээ арай л удаан хүлээлгээд байна уу даа.
Сэтгэгдэл бичих