Метро хот: Гэрлэн дохио хүлээхдээ замын боржур дээр бүү зогс, аюултай

Ажлын урт өдөр дуусаж, гэрийн зүг харихаар алхаж явлаа. Гадаа үүлэрхэг,  бороотой. Дуслууд нь шүхэр тогшино.  Бороон дунд багшийн дээдийн уулзварын гэрлэн дохио асахыг  хүлээн зогсов. Миний хажууд зогсож байсан залуу замын хажуу талын боржур дээр гараад зогсчихов. Гадаа бороо орж байсан учраас би машин замаас  үсрэх  ус, шавхайнаас зайлсхийн хол зогссон юм. Би ч заримдаа энэ залуу шиг  гарцан дээр зогсох олон хүнд түлхэгдэн боржур дээр гарч зогсохоос өөр аргагүй байдалд хүрдэг юм.  Тэгтэл яг нүдний урд боржур  дээр зогсож  байсан залуугийн толгойг автобусны өндөр толь  шүргэх шахам  хурдтай өнгөрөв. Өнөөх залуу бага зэрэг сандран хойш ухарч, замаас холдон гарцаар гарах гэж хүлээх олон хүний дунд орж зогсов. Их л сандарч айсан бололтой харагдлаа. 

 Энэ гэнэтийн үйлдэл олон зүйлийг бодогдуулсан юм. “Хэрвээ автобусны толь үл ялиг доор байрлалтай байсан бол энэ залуу амь насаа ч алдах аюултай байлаа шүү дээ.  Хэчнээн яарч явсан ч гэсэн зам тээврийн хөдөлгөөнд  явганаар оролцохдоо замын боржур дээр гишгэж болохгүй юм байна" гэх мэтээр юу эсийг бодох билээ. 

  Бид хэн нэгнийг  “Зам хөндлөн гарах гэж  боржур  дээр зогсож байгаад осолд оржээ” гэж дуулаагүй.  Харин ингэж зогсох нь маш аюултай нь тодорхойг захын нэг жишээ л баталж байгаа нь энэ. Сүүлийн хэдэн өдрүүдэд  үргэлжлэн орох усархаг борооноос болж  нийслэлчүүд  усанд автаж хаа  сайгүй гол урсаж байна.  Үерийн уснаас болж үүсдэг  хамгийн гол бэрхшээл нь замын эвдрэл юм. 

 Чанар муутай баригдсан замын цемент, чулуунууд усанд идэгдэж хагарч цуурна. Цуурсан хэсэг нь усанд зөөгдөж, тээврийн хэрэгслийн явдалд шидүүлсээр өөр нэг замыг эвдэнэ. Зуны улиралд энэ мэт асуудлууд ар араасаа үл тасрах нь дасал болж дээ. Яагаад заавал замын эвдрэлийг дурдаж байгаа шалтгаан нь  бидний гишгэх шат, зогсох зам хэчнээн жилийн настайг  та мэдэх үү. Тиймээс та зам хөндлөн гарах гэж гэрлэн дохио асахыг хүлээхдээ замын хажуугийн боржур чулуун дээр битгий зогсоорой. Энэ нь нэгдүгээрт, автобусны өндөр толинд цохиулах эрсдэлтэй. Хоёрдугаарт таны зогссон боржур гэнэт хагарч, цуурах эрсдэл өндөр юм. Автомашины хөдөлгөөн идэвхтэй үед  санамсаргүй байдлаар таны зогсож байсан боржур, чулуу хагарч,  бутран  та хөл алдаж, машин зам руу уначихвал  яах вэ.  Энэхүү эрсдэлийг тооцоолбол тун ч аюултай дүр зураг санаанд бууна.

Тиймээс та энэхүү эрсдэлийг тооцоолон зам хөндлөн гарч байгаарай. Мөн  одоо болтол энэ эрсдлийг анзаараагүй хэн нэгэн замын боржур дээр зогсож байвал гарнаас нь татаад буулгаарай. Түүнд ингэж зогсох нь аюултайг  заавал анхааруулж хэлээрэй .  Хотын соёл танаас эхэлнэ.