Ч.Чимэдбат: Хүй долоон худагт түгжрэл, саатал үүсвэл түр хугацаанд зам хаана

 Тулгар төрийн 2229, Их Монгол Улсын 814, Ардын хувьсгалын 99 жилийн ой, үндэсний их баяр наадам өнөөдрөөс эхэллээ.

Өчигдөр баяр наадмын хөтөлбөрийн хүрээнд өнөөдөр Монгол Улсын Төрийн тугийг цэнгүүлэх ёслол Сүхбаатарын талбайд болсон. Харин өнөөдөр 07:00 цагаас хязаалан насны морьдын уралдаан эхэлнэ. Морины уралдааныг МҮОНРТ, ETV, NTV, 25-р суваг телевиз, Эх орон телевизүүд шууд дамжуулан үзүүлнэ. Мөн шагай, сурын харваа эхэлнэ. Орой 19:00 цагаас төрийн хүндэтгэлийн концерт болох бөгөөд бүх телевиз дамжуулна. 

Хурдан морьдын уралдааныг Хүй долоон худагт зохион байгуулах бөгөөд үзэгчгүй зохион байгуулах юм. Энэ үед замын хөдөлгөөний зохицуулалт хэрхэн хийх талаар Тээврийн цагдаагийн албаны Урьдчилан сэргийлэх хэлтсийн мэргэжилтэн, цагдаагийн ахмад Ч.Чимэдбатаас тодрууллаа. 

-Хурдан морины уралдаан үзэгчгүй болно. Гэхдээ цагдаагийн алба хаагчид өмнөх жилүүдийн адил бэлэн байдалд ажиллах уу? 

-Цагдаагийн байгуулагаас баяр наадмын уралдааны үеэр хурдан морь уралдах газарт олон нийтийн аюулгүй байдлыг хангах, хэв журам сахиулах үндсэн үүргийн хүрээнд очиж ажиллана. Энэ жил мөн ЦЕГ-ын даргын баталсан тушаалын дагуу томилгоот албан хаагчид тухайн цэгт очиж ажиллана. 

-Хүй долоон хутагт байдаг авто зогсоолуудыг хаасан гэсэн үнэн үү?

-Энэ жил цахим наадмын үйл ажиллагаа явагдах болсонтой холбогдуулан үзэгчдийг тухайн байршил руу нэвтрүүлэхгүйгээр хурдан морины уралдааныг зохион байгуулна. Хүй долоон худагт тээврийн хэрэгсэл зогсдог зогсоол, талбайг энэ жил ажиллуулахгүй байхаар зохион байгуулалт хийсэн. 

-Морь уралдах үеэр Хүй долоон худгийн зам хаана гэсэн мэдээлэл тараад байна. Зам хаах юм уу?

-Иргэдээс хөдөө орон нутаг руу явах замыг тодорхой хугацаанд хязгаарлах уу гэж асууж байна. Өмнөх жилүүдэд хөдөлгөөний ачаалал болон гэмт хэргээс урьдчилан сэргийлэх, түгжрэл саатал үүсэхээс сэргийлэх зорилгоор нэг чигийн хөдөлгөөнд оруулах, тодорхой цаг хугацаанд замын хөдөлгөөний урсгал, чиглэлийг өөрчлөх, тодорхой цаг хугацаанд түр хаах зэрэг арга хэмжээ авч хэрэгжүүлдэг байсан. Энэ жилийн хувьд шаардлагатай тохиолдол гараад, түгжрэл саатал зэрэг асуудал үүсвэл тухайн цаг минутанд түр хугацаанд замын хөдөлгөөн хаах зохион байгуулалтын арга хэмжээ авна. Хэрвээ тийм тохиолдол гарахгүй бол хөдөлгөөнийг жигд байдлаар зохион байгуулж явуулна. 

-Уяачид морьдоо машинд ачиж Хүй долоон худаг орох юм уу?

-Хурдан морины уралдах газар уяачид морьдоо машинаар ачиж аваачиж уралдана. Үүнтэй холбоотойгоор Г зогсоолын талбайг хурдан морьдыг буулгах зориулалтаар ашиглахаар төлөвлөлт хийгээд, тодорхой самбарууд байршуулсан. Тиймээс уяачид морьдоо ачиж ирээд тухайн самбар бүхий зогсоол талбайд буулгаад уралдаад, буцаад тухайн талбайгаас морьдоо ачаад замын хөдөлгөөнд оролцоод явна. 

-Хүй долоон худаг чиглэлийн авто зам ер нь ачаалалтай байгаа юу?

-Орон нутгийн хөдөлгөөний эрчим огцом нэмэгдсэнтэй холбоотойгоор тухайн чиглэлд алба хаагчдыг хуваарилан ажиллуулж байна. Дарханы зам засвартай байгаатай холбоотой Хүй долоон худгийн шинээр тавигдсан замаар Дархан чиглэлийн тээврийн хэрэгслүүд зорчих болсон. Үүнтэй холбоотой хөдөлгөөн зохион байгуулж ажиллаж байгаа цагдаагийн алба хаагчийн тавьсан шаардлагыг биелүүлж, хөдөлгөөнд соёлтой оролцохыг иргэддээ уриалж байна.

Т.Нандин