ХӨСҮТ: 328 хүний сорьцод шинжилгээ хийхэд коронавирус илрээгүй

ЭМЯ-наас өдөр бүрийн 11:00 цагт өгдөг ээлжит мэдээллээ хийлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  12.3 сая хүн өвчилж, 556 мянган хүн нас баржээ. 7.1 сая хүн эдгэрч, эмнэлгээс гарч, 4.6 сая хүн эмчлүүлж байна.  Сүүлийн 24 цагийн дотор дэлхий дахинд 212 мянган хүн шинээр коронавирусийн халдвар авлаа. Энэ нь нэгдүгээр сараас хойш хамгийн олон хүн халдвар авсан тохиолдол боллоо. 

АНУ-д 64 мянган хүн шинээр халдвар авсан нь хамгийн олон хүн халдварт өртсөн тохиолдол болж байна.  Тиймээс АНУ-ын эрдэмтэд цар тахлыг хяналтдаа авах хэцүү болсоор байгааг хэлжээ.  ОХУ-д сүүлийн 24 цагт 6509 хүн шинээр коронавирусийн халдвар авч, 176 хүн нас баржээ. Манай олон аймагтай хил залгадаг Буриад, Тува, Читид 34-54 хүн халдвар авсан байна. Өчигдөр Истанбулаас тусгай үүргийн онгоцоор 162 хүн ирсэн. Жирэмсэн 8 хүн ирсэн байгаа. 4 хүнийг нь ХӨСҮТ-д тусгаарласан.

Ажиглалтад шинээр  341 хүн орж, 286 хүн гарч, гэрийн тусгаарлалтад шилжсэн. Одоогоор 3050 хүн ажиглалтад байгаа.  Үүнд 1-5 насны 204 хүүхэд, 109 жирэмсэн эмэгтэй, 206 архаг хууч өвчтэй хүн байгаа. Цэргийн төв эмнэлэгт одоогоор 55 хүн хэвтэн эмчлүүлж байна" хэмээлээ.

 ХӨСҮТ-ийн захирал Д.Нямхүү "2020 оны долдугаар сарын 9-ний өдөр ХӨСҮТ-ийн вирус судлалын хоёр, Дархан-Уул аймгийн салбар лабораторид нийтдээ 328 хүний сорьцоос шинжилгээ авахад, бүгдэд нь коронавирус илрээгүй. ХӨСҮТ-д тусгаарлагдсан 3, тусгаарлах байранд тусгаарлагдсан 261 хүний сорьцод шинжилгээ хийхэд вирус илрээгүй.  Тусгаарлах байранд байгаа 29 хүнээс давтан шинжилгээ хийсэн. Алтанбулагийн боомтоор орж ирсэн ачаа тээврийн 25 жолоочоос шинжилгээ хийхэд вирус илрээгүй байна. 

Монголд батлагдсан тохиолдол 227, эдгэрсэн хүн 197, одоо 30 хүн эмчлүүлж байна. ХӨСҮТ-д 67 хүн эмчилгээ, тандалтад байгаа. Өчигдөр шөнө Истанбулын онгоцоор 262 хүн ирсэн. Үүн дотор 42 настай эмэгтэй амаржиж, хоёр ихэр хүүхэдтэй болсон. Одоо ХӨСҮТ-д тусгаарлагдаж, эмчилгээ, хяналтад байна" хэмээлээ.