ТОЙМ: Шинэ засгаа байгуулж, хөл хориог сунгаж, сэрэмжтэй наадамлахыг сануулсан долоо хоног

 Энэ долоо хоногт болсон онцлох үйл явдлуудыг тоймлон хүргэж байна. 

               Ерөнхий Сайд У.Хүрэлсүхийн тэргүүлэх Засгийн Газар байгуулагдлаа

Монгол Улсын 31 дэх Ерөнхий сайдаар томилогдсон У.Хүрэлсүх МАН-ын Удирдах зөвлөлийн хуралд шинэ Засгийн газарт ажиллах сайд нарын нэрсийг танилцуулсан юм. Мөн Улсын Их Хурлын гишүүн, Монгол Улсын Ерөнхий сайд У.Хүрэлсүхийн тэргүүлэх Засгийн газар бүтцийн хувьд ерөнхий чиг үүргийн 6, чиглэлийн 8, нийт 14 яамтай, бүрэлдэхүүний тухайд Монгол Улсын Ерөнхий сайд, Шадар сайд, Засгийн газрын Хэрэг эрхлэх газрын дарга болон асуудал эрхэлсэн нийт 17 гишүүнтэй ажиллахаар болсон юм.

ЗГХЭГ-ын дарга Л.Оюун-Эрдэнэ (УИХ-ын гишүүн)

Шадар сайд Я.Содбаатар (УИХ-ын гишүүн асан)

Эрчим хүчний сайд Н.Тавинбэх (Багануур дүүргийн захирагч)

БСШУ-ын сайд  Л.Цэдэвсүрэн (БСШУСЯ-ны Төрийн нарийн бичгийн дарга)

Сангийн сайд Ч.Хүрэлбаатар (УИХ-ын гишүүн,Сангийн сайд)

Гадаад харилцааны яам  Н.Энхтайван (УИХ дахь МАН-ын бүлгийн дарга)

Зам тээврийн хөгжлийн сайд Л.Халтар (ЗТХ-ийн дэд сайд)

ХХААХҮ-ийн сайд З.Мэндсайхан  (ТӨБЗ-ын газрын дарга)

Соёлын сайд  С.Чулуун (түүхч, академич)

Байгаль орчин, аялал жуулчлалын сайд  Д.Сарангэрэл (Эрүүл мэндийн сайд)

Эрүүл мэндийн сайд  Т.Мөнхсайхан (ЭМЯ-ны Төрийн захиргаа, удирдлагын газрын дарга)

Барилга хот байгуулалтын сайд  Б.Мөнхбаатар (БХ-ийн дэд сайд)

Хууль зүй, дотоод хэргийн сайд  Х.Нямбаатар (УИХ-ын гишүүн)

Нийгмийн хамгаалал, хөдөлмөрийн сайд  А.Ариунзаяа (Үндэсний статистикийн хорооны дарга)

Батлан хамгаалахын сайд Г.Сайханбаяр (Батлан хамгаалах яамны Стратегийн бодлого, төлөвлөлтийн газрын дарга)

Уул уурхайн сайд Г.Ёндон  (“Монголросцветмет” ТӨҮГ-ын Үйлдвэрлэл эрхэлсэн орлогч захирал

        Шүүхээс УИХ-ын гишүүн Ж.Эрдэнэбатад 6, Н.Номтойбаярт 5.5 жилийн ял оноолоо

УИХ-ын гишүүн Ж.Эрдэнэбат  нарт холбогдох эрүүгийн хэргийн шүүх хуралдаан энэ сарын 2,3-ны өдрүүдэд  дараалан үргэлжилсэн. Улмаар шүүгдэгч С.Мандахбатад холбогдох хэргийг хэрэгсэхгүй болгож, шүүгдэгч Ж.Эрдэнэбат, Б.Отгонбаатар, Д.Ганбат, Д.Түвшинжаргал нарыг гэм буруутайд тооцож, ял оногдуулах шүүх хуралдааныг 2020. 07.06-ны буюу өнөөдрийн 09:00 цагт товлосон юм.

Шүүх хурал дөнгөж сая шийдвэрээ гаргалаа. Тодруулбал шүүгдэгч Ж.Эрдэнэбат, Б.Отгонбаатар нарт зургаан жилийн хорих ял оноолоо.  Мөн Ерөнхий сайд асан Ж.Эрдэнэбатыг 6 жил нийтийн албанд томилогдохгүй байхаар шийдвэрлэлээ.

Харин шүүгдэгч Н.Номтойбаяр нарт холбогдох эрүүгийн хэргийн шүүх хуралдаан 2020 оны 07 дугаар сарын 02-ны өдрийн 14:30 цагт эхэлж, 2020 оны 07.07-ны өдөр хүртэл үргэлжилсэн юм. Шүүхээс шүүгдэгч Номт овогт Нямтайширын Номтойбаярт Эрүүгийн хуулийн ерөнхий ангийн 3.1 дүгээр зүйлийн 1, 3.3 дугаар зүйлийн 1 дэх хэсэгт заасныг тус тус журамлан мөн хуулийн тусгай ангийн 22.1 дүгээр зүйлийн 3 дахь хэсэгт зааснаар нийтийн албанд томилогдох эрхийг 5 жилийн хугацаагаар хасч, 5 /тав/ жил 5 /тав/ сарын хугацаагаар хорих ялыг оноосон юм. Ийнхүү шүүхээс гаргасан “ширүүн” шийдвэрт олон нийт ч талцаж мэтгэлцсээр.

ЭМЯ: 328 хүний шинжилгээ “СӨРӨГ” гарав

Долдугаар сарын 9-ний өдөр ХӨСҮТ-ийн вирус судлалын хоёр, Дархан-Уул аймгийн салбар лабораторид нийтдээ 328 хүний сорьцоос шинжилгээ авахад, бүгдэд нь коронавирус илрээгүй. ХӨСҮТ-д тусгаарлагдсан 3, тусгаарлах байранд тусгаарлагдсан 261 хүний сорьцод шинжилгээ хийхэд вирус илрээгүй.  Тусгаарлах байранд байгаа 29 хүнээс давтан шинжилгээ хийсэн. Алтанбулагийн боомтоор орж ирсэн ачаа тээврийн 25 жолоочоос шинжилгээ хийхэд вирус илрээгүй байна.

Монголд батлагдсан тохиолдол 227, эдгэрсэн хүн 197, одоо 30 хүн эмчлүүлж байна. ХӨСҮТ-д 67 хүн эмчилгээ, тандалтад байгаа. Өчигдөр шөнө Истанбулын онгоцоор 262 хүн ирсэн. Үүн дотор 42 настай эмэгтэй амаржиж, хоёр ихэр хүүхэдтэй болсон. Одоо ХӨСҮТ-д тусгаарлагдаж, эмчилгээ, хяналтад байгаа юм байна.

Өндөржүүлсэн бэлэн байдлыг энэ сарын 30 хүртэл сунгалаа

Засгийн газрын өнөөдрийн хуралдаан өндөрлөлөө. Хуралдаанаар цар тахалтай холбоотойгоор өндөржүүлсэн бэлэн байдлын зэрэгт шилжүүлсэн хугацааг 2020 оны долдугаар сарын 31-ний өдрийг дуустал буюу 15 хоногоор сунгалаа.

Өмнө нь Улсын онцгой комисс хуралдаж, бэлэн байдлын зэрэгт шилжүүлсэн хугацааг долдугаар сарын 15-н хүртэл сунгасан байсан юм.

                              Энэ жилийн элсэлтийн шалгалтад 196 хүүхэд 800 оноо авчээ

Элсэлтийн ерөнхий шалгалт долдугаар сарын 2-5-нд улс даяар амжилттай зохион байгуулагдаж дууссан. Энэ жилийн шалгуулагчдын хувьд дэлхий нийтээр тархаад буй шинэ коронавирусийн халдвараас улбаалан онцгой жил байсан. 2020 оны элсэлтийн ерөнхий шалгалтад улсын хэмжээнд нийт 30,902 хүүхэд оролцсоноос 196 хүүхэд 800 оноо авжээ.  Тодруулбал, орос хэлний хичээл дээр хамгийн их буюу 67 хүүхэд 800 оноо авсан байна.  Тэдний 84 хувь нь Улаанбаатар хотын сурагчид. Харин Монгол Улсын түүхийн хичээл дээр хамгийн бага буюу хоёр хүүхэд 800 оноо авчээ. Тэд маань элсэлтийн шалгалтад оролцосн сурагчид дундаасаа оюуны хувьд ширүүн өрсөлдөөнөөр гарч ирсэн гэхэд хилсдэхгүй.

                                                 Үерийн улмаас 8 хүн амь насаа алджээ

Сүүлийн өдрүүдэд ихэнх нутгаар дуу цахилгаантай, аадар бороо орсны улмаас гол мөрөн үерлэх, уруйн үер бууж, иргэд үерт өртөх эрсдэл их байна. Тухайлбал, Долдугаар  сарын 03,04-ний өдрүүдэд орсон хүчтэй аадар борооны улмаас Төв аймгийн нутаг дэвсгэрт 5000 гаруй, Говьсүмбэр аймгийн Сүмбэр сумын нутаг дэвсгэрт 1000 орчим, Архангай аймгийн Эрдэнэмандал суманд 1100 орчим бог мал, нийт 7000 гаруй толгой мал хорогдсон байна.  

Төв аймгийн Зуунмод суманд 209, Алтанбулаг суманд 200, Хөвсгөл аймгийн Мөрөн суманд 53, Хэнтий аймгийн Хэрлэн суманд 1971, нийт 2360 гаруй айл өрх,  13 нийтийн орон сууц үерийн усанд автжээ. Түүнчлэн үерийн улмаас 8 хүн амь насаа алдсны  6 нь том хүн, 2 нь хүүхэд байсан байна.

         Завхан аймгийн нутагт Орхон аймгийн долоон багш осолдож амь насаа алдлаа

Долдугаар сарын 9-н буюу өчигдөр 18:00 цагийн орчимд орон нутгийн замд автомашин онхолдож долоон хүн амиа алдсан харамсалтай хэрэг гарсан билээ.

Тээврийн цагдаагийн албанаас өгсөн мэдээллээр, Завхан аймгийн Тэлмэн сумын Баян-Айраг багийн нутаг дэвсгэр Шумуултайн ар гэх газар Увс аймгаас Эрдэнэт хотын чиглэлд зорчиж явсан Toyota Аlphard маркийн автомашин замаас гарч онхолдон, автомашинд байсан долоон зорчигч амь насаа алдсан харамсалтай явдал болсон юм. Тэгвэл эдгээр иргэд Орхон аймгийн Баян-Өндөр сумын 4 болон 14-р сургуулийн багш нар байжээ.

Орхон аймгийн ИТХ, ЗДТГ болон сургуулийн хамт олноос эмгэнэл илэрхийлжээ.