Метро хот: Смарт картаа үргэлж цэнэглэж, тогтмол ашиглаж хэвшицгээе

Хөл хөдөлгөөнтэй нийслэлийг хааяа санах юм. Саяхан л гэхэд баяр наадмын өдрүүдээр хот тэр чигтээ эзгүйрч, хааяа ганц нэгээрээ алхалсан хүмүүс энд тэнд үзэгдэнэ. Хичээл сургуулийн үеэр нойрондоо дарагдсан, элдвийг ярилцсан залуус завгүй амьдралдаа хэдийнээ дассан мэт нэг автобуснаас нөгөөд дамжин суух нь бий. Ийн ажиглах зуур “Оюутан гэж дарахаасаа ичээд мөнгө өгчихлөө” хэмээн шивнэлдсээр хэсэг залуучууд ороод л ирнэ. Зарим нь бүр хариулт нэхээд зогсчихдог нь хэвийн л үзэгдэл болсон гэхэд хилсдэхгүй.

Автобусны кондуктор эгчид хөөгдөн байж тасалбар авдаг байсан үеэ бодоход техникийн дэвшлийг ашиглан карт уншуулаад л мөнгөө төлдөг болсноос хойш багагүй хугацаа өнгөрчээ. Гэвч нийтийн тээврээр зорчихдоо картаа бус мөнгөө сарвайдаг соёлгүй хэсэг хүмүүс олны дунд байсаар л. Зарим нь бүр мөнгөө ч төлөхгүй зорчиж харагддаг. Ялангуяа бидний нэрлэж заншсан урт цэнхэр автобусанд. Учир нь зарим иргэд тус автобусны  арын хаалгаар нь үнэ төлбөргүй зорчих хандлагатай байдаг. Хүн болгон энэ мэт үнэгүй зорчоод байвал жолоочид, хянагчдын цалин,  нийтийн тээврийн шатахуун түлшний үнийг хэрхэн олох билээ.

Сүүлийн үед автобус бүр хянагчтай явдаг болсныг та анзаарсан л биз. Тэд зорчигч таны үйлдлээс илүү хариуцлага алдах жолооч нарыг хянадаг юм. Учир нь зорчигчоос сул мөнгө авсан жолоочийг 25 мянган төгрөгөөр торгож, цаашилбал сахилгын хороогоор оруулах хүртэл арга хэмжээ авдаг аж. Зарим үед бэлэн мөнгөөр үйлчлүүлж байсан иргэн, хянагч хоёрын хоорондоо маргалдаж буйтай ч тааралдана. Гэвч чанга дуугаар хараал урсгахаасаа урьтаад тэд ч үр хүүхдээ тэжээхийн тулд ажлаа хийж байгаа гэдгийг санаарай.

Гэвч зөвхөн зорчигчдод буруутан нэрийг зүүлгэх нь нэг талаараа өрөөсгөл. Хаа таарсан газар бүрт автобусны картаа цэнэглүүлэх цэгүүд тийм ч их биш. Хаяг өлгөөстэй хэдэн түцүүд нь хаалттай байх нь ч бий. Ийм байхад мөнгө өгч суухаас өөр аргагүй байдалд орно.  Мөнгөгүй бол автобусанд  хөл ч тавих боломжгүй гэдгийг хүн бүр л мэдэх биз. Иймд холбогдох байгууллагууд нь карт цэнэглэх цэгүүдийн ажиллагааг идэвхжүүлж эхлэх шаардлага зүй ёсоор тавигдаж байна. Харин зорчигчид нь картаа үргэлж цэнэглэж, тогтмол хэрэглэх соёлд суралцаж чадвал нийтийн тээврийн хөгжил ч энүүхэнд билээ. 

Өчүүхэн жижиг хариуцлагатай үйлдлээс хотын соёл эхлэх билээ. Иймээс та яг одоо смарт картаа цэнэглүүлээрэй.