Метро хот: Үйлчлүүлэгчдээ инээмсэглэлээр угтаж, хүндлэлээр үдэцгээе

Бидний өдөр тутмын амьдрал хүнсний дэлгүүр, худалдааны төв, хоолны газруудын хаалгыг татаж өрнөдөг. Энэ нь их хотын идэвхтэй амьдралын нэг хэлбэр юм. Саяхан ажлынхаа ойролцоох цайны газраар үйлчлүүлэх гэж байхдаа нэгэн таагүй хандлагыг олж харав. Цайны цагийн үед талбай багатай хоолны газрын ихэнх ширээ эзэнтэй байлаа. Захиалга өгч зөөгчид  бичүүлсний дараа кассны ойролцоох ширээнд сууж байв. Гаднаас биеийн тамирын хослолтой, том цүнх үүрсэн хоёр охин саяхан дууссан бэлтгэлийнхээ тухай ярьсаар орж ирэв. Зөөгчид  хандан “Хоёр тавганд дөрвөн хуушуур, хоёр аяга цай авъя” гэж захиалга өгөөд зэргэлдээх ширээнд сууцгаав. Гаднаас хүмүүс нэмэгдэж орж ирсээр, зарим нь хаалгаар түлхэлцэн гарцгаана. Зэргэлдээх ширээний охид  захиалсан хоолоо авах гэж удаан хүлээсэн учраас зөөгчөөс захиалсан хоол нь хэр удахыг асуусан ч зөөгч хариу дуугарсангүй. Тэдний нэг араас нь очиж дахин асуухад “Тэр хүлээж бай л даа. Дөрөвхөн хуушуур биз дээ. Хүн ихтэй байхад чинь” гэж уцаарлав. Чанга дуугаар загнуулсан охид, тэнд байсан хүмүүсээс ичсэн бололтой амандаа бувтнан хаалга саван гарч одов.

Харилцааны соёлгүй үйлдэл, бусдыг ялгаварлан хандсанаараа үйлчлүүлэгчээ алдаж байгаа нь харамсалтай юм.   Тэр үед зөөгчийг үйлчлүүлэгчийнхээ захиалсан хуушуурын төлөө уурласан уу, хэт их ачааллын үед стресст орсон уу гэдгийг ойлгосонгүй.

Зөвхөн энэ үйлдлээс гадна, гэр хороолол, байрны ойролцоох хүнсний дэлгүүрүүдийн худалдагчид  хүртэл сөрөг хандлага, ажлын ачаалал, стрессээ  үйлчлүүлэгчдээ тарааж байдгаас  болж тэднийг өөрсдөө түлхдэг. Бид хэдийгээр чанартай, хэзээ, хаана үйлдвэрлэсэн нь баталгаатай бараа бүтээгдэхүүнээр  үйлчлүүлэхийг хүсдэг ч үйлчилгээний газрын ажилчдын харилцааны соёл, найрсаг  хандлагад илүү татагддаг. Харилцааны соёл нь бидний үг хэллэг болон биеийн хэлээр илэрдэг томоохон соёлуудын нэг.  

 Тиймээс бусдад зөв хандлага, харилцааны соёлыг түгээхийн тулд үйлчлүүлэгчдээ инээмсэглэн угтаж, хүндлэлээр үдэх нь хотын соёлыг түгээж буй нэг хэлбэр юм.