ЖИНХЭНЭ ЖДҮ: Ууланд отоглон амьдрагчдын “Нүүдэлчин сэрэхүй брэнд”

         Энэ удаагийн “ЖИНХЭНЭ ЖДҮ” буландаа үндэсний өв соёлыг түгээн дэлгэрүүлэгч, өөрсдийн өвөг дээдэс болох шүтээнтэйгээ холбогдон бусдын сайн сайхны төлөө сүсэглэн,  бүтээл урладаг “Нүүдэлчин сэрэхүй брэнд”-ийн менежер Г.Дэлгэрсайхантай ярилцлаа. Түүнийг “ Монголын Хиян” бүлхэмдэлийн зоригтон Дэлгэрсайхан хэмээдэг. Тэд бүлхэмдэлээрээ  Тэрэлжийн “Бүрэн хаант Өлгий” гэдэг ууланд отоглон амьдардаг.  Нийгмийн хөгжилтэй уралдан хүн бүр Нийслэл хотыг бараадаж, техник технологийн өөрчлөлтийн араас хошуурцгаах болсон энэ үед эдгээр хүмүүсийн амьдралын хэв маяг, тэдний урласан бүтээл нь та бүхний сонирхлыг аргагүй татах биз ээ. Тэдний отоглон амьдардаг бүлхэмдэлд Говийн өмнөх Монгол, Буриад, Халимаг гэх мэт олон Үндэстэн нэгдэн амьдардаг.  Тэд өөрсдийгөө “Өвөг дээдсийн дуудлагаар нэгдэн,  нэг гэр бүл болон өөрсдийн хувь тавилангаар өвөг дээдсийн үйлийг бүтээх гэж нэгдсэн хүмүүс” хэмээн хэлж байлаа.

-Та "Нүүдэлчин сэрэхүй" брэндийн талаар бидэнд танилцуулаач?

-Бид   "Нүүдэлчин сэрэхүй" нэрийн дор өндөр дээд өвөг дээдсийнхээ үйлийг ертөнц, хорвоод бүтээж яваа хүмүүс юм. Монголчуудыг мандан бадраах их үйлийн язгуур нь бидний хийсэн бүтээлүүд юм. Бид бүтээлүүдээрээ дамжуулаад мандан бадрах заяа тавилантай хүмүүсийг босгох, сэргээх  үйлийг хийж байна. 

-Бүтээлүүдээ хэзээнээс хийж эхэлсэн бэ. эдгээр бүтээлийг хийх болсон зорилго, санаа сэдлийг хаанаас хэрхэн олсон бэ?

-Бид 2008 оноос бүтээлүүдээ хийж эхэлсэн. Харин бүтээл хийхээсээ өмнө  Тэрэлжийн “Хөх төрмөстэй"  гэдэг газарт отоглон амьдардаг байсан. Тэнд өвөг дээдсийнхээ ухаанд суралцсан. Өвөг дээдэс минь бидэнд “Мандан бадрах тавилантай хүмүүсийг сэрээ. Тэднийг сэрээхийн тулд эдгээр бүтээлүүд хэрэгтэй гэж хэлсэн”.  Тиймээс бид өвөг дээдсийнхээ хүслээр эдгээр бүтээлүүдийг хийж түмэн олонд түгээх болсон.  Одоо бид Тэрэлжийн "Бүрэн хаант Өлгий"  гэдэг газарт амьдарч байна.

  Айл гэрийн гал голомтоос эзэн төрийн гал голомт үүсэж тогтдог

-Та бүхэн өвөг дээдсийнхээ захиасаар ямар бүтээлүүдийг урладаг  вэ?

-Бид сэтгэл оюуныг ариулагч домт бүтээлүүд хүмүүний эд, эс эрч хүчийг нөхөн сэргээгч өвчний үндсийг даран эрүүлжүүлэх домт бүтээлүүд нүүдэлчин бэлгэ ухааны нэгээхэн хэсэг, үр хойчсоо төлөвшүүлэх, мэргэшүүлэх , гэгээрүүлэх зөн билэг оюуны гайхамшигт чадвартай болгон бие сэтгэл оюуныг засахуйн ухаанд суралцуулах төгс хэрэглэгдэхүүн язгуур наадхайн цуврал бүтээлүүд мөн хүмүүнийг эзэн оршоох оноолтод эд, эдлэл зөвхөн эзэн хүнд нь зориулагдсан бүтээлүүд өргөө гэр орныг хар хор, муу нөлөөллөөс хамгаалах домт бүтээлүүд хүний аргын ухаанаар бүтээсэн бүтээгдэхүүний хор хөнөөл, гаж нөлөөллөөс салгах домт бүтээлүүд /цахилгаан соронзон долгион элдэв нөлөөллийг саармагжуулах,  хамгаалах үйлчилгээтэй/  Нүүдэлчин Монгол хаан дээдсийн зарлиг сургаалиуд нүүдэлчин монгол соёлыг харуулсан бэлэг дурсгалт болон хэрэглээний бүтээлүүдийг урладаг.  

Жишээлбэл, Монгол далны домт бүтээлийн талаар тайлбарлая. Энэ нь өргөө гэрийнхээ үүднийхээ зүүн талд өлгөх зориулалттай, гэр орныг гаднаас ирж буй хар хор муу муухай бүхнээс хамгаалж олз омог, хишгийг даллан дуудаж гэнэтийн гай гарлагыг зайлуулдаг. Айл гэр бат бэх оршихын үндэс нь өвөг дээдсийнх нь ариун дээд гал голомт байдаг. Өнөөдрийн нийгэмд хүмүүс гал голомтынхоо үнэн мөн чанар, утгыг нь ойлгохгүй зүгээр л нэг тулга гэртээ тавьчихвал болох мэт боддог. Гэтэл бидний өвөг дээдэс өөрсдийн өвөг дээдсийнхээ  ариун дээд гал голомтыг залгаж, бадрааж байсан түүхтэй юм. Жишээлбэл, айл гэрийн эзэн өөрийнхөө хүүг тусад нь гаргахдаа өөрийн тулганд асаж буй өвөг дээдсийнхээ галыг таслаж, өвлүүлж өгдөг. Хүү нь өвөг дээдсийнхээ ариун дээд галыг цааш залгуулан бадрааж үр хойчдоо өвлүүлдэг ёстой. 

Айл гэрийн гал голомтоос эзэн төрийн гал голомт үүсэж тогтдог. Төр улс мандан бадрах нь өрх гэрийн ариун дээд гол голомтоос эхлэлтэй юм. Харин сүүлийн үед бид өвөг дээдсийнхээ ариун дээд гал голомтыг орхиж, гээгдүүлсэн  байдаг. Бид тэдгээр хүмүүст өвөг дээдсийнх нь ариун дээд гал голомтыг дахин сэргээхэд нь тусалдаг.

-Сүүлийн үед ихэнх хүмүүс орон сууцанд амьдардаг болсон. Тэдгээр хүмүүс танай бүтээлүүдийг хэр сонирхож, худалдан авалт хийдэг вэ?

-Тийм шүү. Хүмүүст хамгийн хэрэгтэй зүйл нь өвөг дээдсийнх нь ариун дээд гал голомт байдаг. Маш олон хүн бидэнд хандаж өвөг дээдсийнхээ гал голомтыг сэргээлгэж, сайн зам руу орсон хүн олон байна. Бид бүтээлүүдээ маш олон үзэсгэлэнд оролцож борлуулдаг. Манай бүтээлүүдийг харсан хүмүүс маш их гайхан сонирхож, музейн үзмэрүүд мэт хүлээж авдаг. Тэдгээр хүмүүст утга, агуулгын маш сайн тайлбарлаж өгдөг. Бид 2008 оноос хойш хэдэн мянган хүнд өөрсдийн бүтээлээ хүргэсэн байгаа.

-Үндэсний өв соёлыг дүрсэлсэн бүтээлүүдийг дотоодын хэрэглэгчдээс илүү гадаадын жуулчид олноор нь худалдаж авдаг мэт санагддаг. Танай бүтээлүүдийг гадны зочид их сонирхдог байх?

-Тийм шүү жуулчид маш их сонирхдог. Жишээлбэл, бидний урладаг ширээний гэрлийг жуулчид маш их сонирхдог. Учир нь уг бүтээлийг байгалийн жамаараа унаж боловсорсон тэнгэр таалсан модны мөчрөөр урласан.Мөн энгийн нэг мод биш бидний отоглож амьдардаг “Бүрэн хаант өлгий” өвөг дээдсийн шүтээнээс ирсэн мод юм. Энэ нь ариун газрын энергийг өөртөө шингээсэн модоор урладаг. Бүтээлүүддээ маш нарийн дүрслэл, утгыг шингээж хийдэг.