Метро хот: Орон сууцны хонгил, булан хогийн сав биш

Гэр хороолол муухай. Өвөл нь утаатай, бусад үед хог хаягдал нь дийлдэхгүй. Зуны халуунд салхи, шороо босоод хэцүү гэж ярилцах хүн олон. Тэгвэл нийслэлийн хаана ч гэсэн хог хаягдалтай холбоотой асуудлууд байсаар л байна. Гэр хорооллынхон муухай, орон сууцныхан цэвэрхэн хоггүй орчинд амьдардаг гэдэг ойлголт бол  өрөөсгөл юм. Хог ачилт, хог, ангилах, хогийн савны асуудлууд  хэзээ шийдэгдэх юм бэ.  Улаан- хуарангийн эцэст байрлах нэгэн орон сууцны хонгилд уут, уутаар дүүрэн хог байх юм. Хоёр, гурав, цаашлаад давхар бүрийн булан, айлуудын  хаалганы урд гялгар уутанд боож тавьсан хогуудыг том, жижгээр нь эгнүүлэн өржээ. Мөн орцны гэрэлтүүлэг муугаас гадна, орчны цэвэрлэгээ ч хангалтгүй хийгддэг бололтой.

Хэдийгээр нь орцны цэвэрлэгээ, хог ачилт СӨХ-тэй холбоотой хэдий ч иргэд өөрсдийн эрүүл ахуй мөн бусдын тав тухтай байдлын төлөө хог хаягдлаа ил задгай хаяхгүй байх хэрэгтэй. Өөрийн амьдарч буй орчноо цэвэр, цэмцгэр байлгах нь хотын соёлын нэг хэлбэр  мөн. Харин хог хаягдлыг ил задгай хаядаг асуудалд хяналт хэзээнээс эхэлж тавьж эхлэх вэ. Энэ асуудал ихэвчлэн хяналтын камергүй орон сууцанд их гардаг байх. Учир нь хэн, хэзээ хаясан гэдгийг  нь тодорхойлох боломжгүй учраас зарим иргэд хогоо ил хаяна. Зарим тохиолдолд хогийн бункер, хогийн сав нь гадаа байдаг  орон сууцанд амьдардаг өрхүүдийн хонгил, булан үнэгүй хогийн цэг шиг харагдах тохиолдолтой олон таарч байсан. Ахуйн хог хаягдлаа зориулалтын хогийн сав, хог агуулах бункерт хаядаггүй олон өрхөд хог ангилах тухай ойлгуулахад бэрх бололтой. Эхлээд хогоо ил задгай хаяхгүй байхад суралцах  хэрэгтэй юм байна.