ЖИНХЭНЭ ЖДҮ: Байгалийн гаралтай гоо сайханы бүтээгдэхүүн үйлдвэрлэгч "Инару" брэнд

Энэ удаагийн "ЖИНХЭНЭ ЖДҮ" буландаа байгалийн гаралтай гоо сайхны бүтээгдэхүүн үйлдвэрлэгч “Инару” брэндийг онцолж байна. Тэд байгалийн түүхий эдээр хийсэн ахуйн болон арьс арчилгааны бүтээгдэхүүнийг эх орондоо үйлдвэрлэдэг билээ.  “Инару” брэнд 2016 онд хамгийн анхны хонины сүүл, адууны тостой шахмал саванг үйлдвэрлэж байсан бол өнөөдөр есөн нэрийн 23 төрлийн бүтээгдэхүүн үйлдвэрлэсэн байна. Ингээд “Инару” брэндийн үүсгэн байгуулагч, гүйцэтгэгч захирал Н.Сарангуатай ярилцлаа.

-Та ямар мэргэжилтэй бэ. Амьтны гаралтай тос ашиглаж гоо сайхны бүтээгдэхүүн хийх санаа хэрхэн төрөв?

-Би бизнесийн удирдлагын чиглэлээр сурч боловсорсон. Сургуулиа төгссөнөөс хойш маш олон жил гадаадын улс орнуудаар явсан. Тэр үед гаднынхан надаас “Монголын брэнд юу вэ. Байдаг уу” гэж маш их асуудаг байсан. Мөн Монголоос бэлэг, дурсгалын зүйл авах хэрэгтэй болоход “Govi” брэндээс өөр зүйл байдаггүй байлаа. Тэр үед үндэсний өөр брэнд болохуйц бүтээгдэхүүнүүд олон байгаасай, Монголд үйлдвэрлэл яагаад хөгждөггүй талаарх бодлоос бизнесээ эхлүүлэх сэдэл төрж байсан. Миний хамгийн чухал хүсэл бол “Монгол” гэдэг нэрийг дэлхийн тавцанд гаргах байлаа. Мөн хүүхдээ төрүүлээд удаагүй байхдаа бүсгүйчүүдийн хэрэглэдэг гоо сайхны бүтээгдэхүүнд хүний биед хортой химийн бодис маш их агуулагддаг болохыг мэдсэн. Түүнээс хойш хүүхэд болон ээжүүдэд зориулсан химийн бодис агуулаагүй бүтээгдэхүүн хийх хүслээр энэ салбарт ажиллах болсон доо.

-Анх бүтээгдэхүүн хийж эхлэхэд ямар хүндрэл тулгарч байсан бэ. Амьтны гаралтай тосоор гоо сайхны бүтээгдэхүүн гаргаж хэрэглээнд нэвтрүүлэхэд техник хэрэгслээс эхлээд шинэлэг зүйлс маш их шаардсан байх?

-Дэлхий нийт адууны тосыг гоо сайхны бүтээгдэхүүнд ашиглахыг хүлээн зөвшөөрсөн байдаг. Учир нь адууны тос бусад тоснуудаас хэд дахин илүү хүний арьстай тохирох бүтэц агуулдаг. Ахмадууд адууны тосыг ясанд хүртэл нөлөөлдөг гэж ярьцгаадаг. Энэ уламжлалт аргыг орчин үеийн технологитой хослуулахад маш олон асуудал үүснэ. Жишээлбэл, хонины сүүл, адууны тосонд онцгой үнэр агуулагддаг.

Бүтээгдэхүүнийхээ түүхий эдийг хаанаас, хэрхэн авдаг вэ?

-Дотоодын 20 орчим түүхий эд байдаг. Харин гадны 30 гаруй түүхий эдийг ашиглаж бүтээгдэхүүнээ боловсруулдаг. Эдгээрээс суурь тос, эфирийн тоснууд илүү их хувийг эзэлдэг. Эфирийн тоснуудыг ашиглаж тансаг үнэртэй, эрүүл мэндэд тустай бүтээгдэхүүнүүд бэлэн болдог. Харин бидний өдөр тутам ашигладаг бүтээгдэхүүнүүд дунд эфирийн тос агуулсан зүйлс тун ховор байдаг. Учир нь эфирийн тос хамгийн үнэтэй бүтээгдэхүүн. Жишээлбэл, 1кг нь 500 мянгаас 2сая төгрөгөөр худалдаалагддаг. Мөн үнэрээр арьсыг эмчлэх үйлчилгээ үзүүлдэг.

-Шахмал саванг гар аргаар хийхэд маш урт хугацаа шаардлагатай байдаг. Тэгвэл амьтны гаралтай гоо сайхны бүтээгдэхүүн хийхэд хугацаа илүү шаарддаг уу?

-Тэгэлгүй яахав. Нэг саван гаргаж авахын тулд хоёр жилийн хугацаа шаардсан. Харин байгалийн гаралтай гоо сайхны бүтээгдэхүүн хийхийн тулд тосны тогтвортой байдлын тест, найрлагыг маш сайн шалгаж боловсруулахад маш удаан хугацаа шаардлагатай. Манай бүх бүтээгдэхүүн тосон суурьтай. Энд ямар ч хадгалах бодис ороогүй гэсэн үг. Учир нь бүтээгдэхүүнд ус орвол бактери үүсгэх эрсдэлтэй байдаг. Энэ нь ус орсон гоо сайхны бүтээгдэхүүнд хадгалагч химийн бодис орсон гэсэн үг. Харин ихэнх компани хямдхан байдаг учраас хадгалагч бодис ашигладаг. Бид өдөр тутмын амьдралдаа хадгалах бодистой бүтээгдэхүүн маш их хэрэглэдэг. Монголчууд байгалийн гаралтай бүтээгдэхүүн үнэтэй гэж голдог. Харин тухайн бүтээгдэхүүний орц, найрлага, дотор нь үнэтэй түүхий эд орсон байдаг учраас л үнэтэй байдаг. Органик бүтээгдэхүүнд ашигладаг эфирийн тосыг боловсруулахад маш өндөр өртөг шаарддаг. Чанартай бүтээгдэхүүнийг үнэ дагадаг гэж ярьдаг шүү дээ. Гэвч бид чанартай бүтээгдэхүүнийг хямд үнээр хэрэглэгчдэд хүргэхийн тулд маш их хичээж ажилладаг. Нэг бүтээгдэхүүнийг боловсруулахын тулд маш удаан хугацаа шаарддаг. Жишээлбэл, бид нэг жилийн хугацаанд шинэ бүтээгдэхүүн гаргаагүй, харин шинэ төрөл гаргах туршилт, боловсруулалтаа хийсээр байна.