МУГЖ Ж.Мөнхсайхан: Өнөөдөр “золиг”-ийн сайхан өдөр болж байна

 Монгол Улсын Ерөнхийлөгч Х.Баттулга өнөөдөр , төр, улсдаа  олон жил зүтгэсэн хүмүүс Төрийн дээд одонгоор шагналаа. Тэр дундаа  үзэгч олны хайр хүндэтгэлийг хүлээж, тайз дэлгэцийн салбарт тууштай 30 гаруй жил хөдөлмөрлөсөн “Маск” продакшны жүжигчин Ж.Мөнхсайхан, “Х-Түц” продакшны жүжигчин Н.Онон  нарт МУГЖ цол хүртээлээ.   Түүнчлэн Монголын шилдэг теноруудын нэгд зүй ёсоор тооцогддог  СТА Батсайхан авьяас,  чадвараа үнэлүүлж Монгол Улсын гавьяат жүжигчин гэдэг эрхэм шагналын эзэн боллоо. Энэ өдөр энгэрээ мялаалгаж буй гавьяатнуудыг хүндэтгэн тэдний гэр бүл, найз нөхөд хамт олон нь Төв талбайг дүүртэл олуулаа цугласан байв. Шинэхэн гавьяатуудыг хүлээж буй хамт олон, найз нөхдийнх сэтгэлийн үгийг сонсож, шинэхэн гавьяатуудын баярт мөчийг хуваалцлаа.

МУГЖ Ж.Мөнхсайхан: Өнөөдөрийн алдарт хүргэсэн үзэгчиддээ баярлалаа  

-Ард түмнийхээ итгэлийг хүлээж, энэ эрхэм алдрыг хүртэж байгаадаа маш их баярлаж байна. Өнөөдрийн энэ алдарт хүргэсэн үзэгчид та бүхэн, хамт олондоо баярлалаа. Өнөөдөр “Золиг”-ийн сайхан өдөр болж байна. Төр түмэндээ баярлалаа.

МУГЖ Н.Онон: 31 жилийн хөдөлмөрөө үнэлүүллээ

 -Би 31 жил урлагийн салбарт ажилласан байна.  Ирэх жил “Х-Түц” продакшны 25 жилийн ой тохионо. Хамт олондоо баярлалаа. Урлагийн амьдрал бол маш өрсөлдөөнтэй ч сайхан салбар. 31 жил ажилласны дараа төрд хөдөлмөрөө үнэлүүллээ.

МУГЖ Т.Батсайхан: Нийтийн дууг шимтэн сонсдог монголчууддаа баярлалаа

 -Монгол Улсын гавьяат гэдэг нэр хүндтэй цолоор энгэрээ мялаасандаа маш их баяртай байна. Энэ цол дан ганц минийх биш.  Өмнөговь аймгийн зон олон, нутгийн минь уул, ус баярлаж байгаа байх. Төрүүлж өсгөсөн аав,ээждээ баярлалаа. Би 1997 онд Өмнөговь аймгийн театрт дуучнаар орж байсан. Тэр үед надад зааж сургасан багш нар, СУИС-ийн багш Ичинхорлоодоо баярлалаа. Нутгийн зон олон, нийтийн дууг шимтэн сонсдог нийт монголчууддаа маш их баярлалаа.

МУГЖ П.Эрдэнэзаан: Энэ бол бидний эв нэгдлийн хүч

 -Монгол Улсын гавьяат жүжигчин гэдэг шагналын үнэ цэнийг эв нэгдлийн хүч гэж харж байна. Цаашдаа  энэ шагнал хошин урлагийн салбарт  эв нэгдлийн бэлгэдэл болох байх. Учир нь бид 15 жилийн турш биесээ ойлгож, дэмжиж, уран бүтээлийн хувьд маш сайн ойлголцож , жаргал зовлонгоо хуваалцаж өнөөдрийн хүрсэн. Энэ бол бидний эв нэгдэл, хүч.

МУГЖ М.Баярмагнай: Хэлэх ч үггүй болтлоо баярладаг юм байна

 -Магнайгаа тэнийтэл баярлаж байна. “Маск” продакшин хамт олноороо хүрэлцэн ирлээ. Би хөдөөнөөс саяхан орж ирлээ. Энэ сайхан мэдээг сонсоод маш их хөөрч, догдоллоо. Энэхүү шагнал бол жүжигчин хүний хамгийн үнэ цэнэтэй шагнал шүү дээ. Хэлэх ч үг олдохгүй болтлоо баярладаг юм байна.

МУГЖ И.Одончимэг: Ж.Мөнхсайханыг П.Эрдэнэзаан, М.Баярмагнай хоёрын өмнө гавьяат авах ёстой байсан гэж боддог

 -Өнөөдрийн гавьяат жүжигчдийн шагнал нүдээ онолоо гэж харж байна. “Х-Түц” продакшны жүжигчин Н.Онон, “Маск” продакшны жүжигчин Ж.Мөнхсайхан нар урлагт тууштай маш олон жил зүтгэсний эцэст энэ шагналыг авлаа. Миний хувьд Монгол Улсад Н.Онон шиг хүүхдийн дүрийг маш сайн бүтээдэг жүжигчин байхгүй. Мөн энэ хоёр хүн бол тайз дэлгэцийн гүүр, маш олон хүнийг урлагт хөтөлсөн багш нар. Хошин урлагийн уналт босолтыг өөрсдийн биеэр туулсан. Унахад нь сэргээх гэж зүтгэсэн гавьяатнууд. Энэ шагналыг нүдээ оносон гэхэд маргах хүн гарахгүй байх. Би Ж.Мөнхсайханыг,  П.Эрдэнэзаан, М.Баярмагнай хоёрын өмнө гавьяат цол авах ёстой байсан гэж боддог. Ингэж хэллээ гээд Магнай, Заанаа хоёр надад гомдохгүй. Би сайн мэдэж байна. Ж.Мөнхсайхан бол чадвартай жүжигчин.

Т.Эрдэнэчимэг