СЕХ: Асуудалд холбогдоод буй нэр дэвшигчдийн хэргийг шүүхээр шийдсэний дараа буруутай бол эргүүлэн татна

СЕХ-ноос мэдээлэл хийлээ. Улмаар 2020 оны аравдугаар сарын 15-нд орон нутгийн сонгуулийн санал авах өдөр товлогдсон. Сонгуулийн бэлтгэл ажил бүрэн хангасан. Санал хураалтын өдрийн сонгуулийн автоматжуулсан системийн найдвартай байдал, нийгэмд үүсээд байгаа эргэлзээг арилгах зорилгоор сонгуулийн туршилтын санал хураалтыг нээлттэй зохион байгуулж үзүүлэх гэж байгаа талаар мэдээллээ. Уг үйл ажиллагаанд сонгуульд оролцож байгаа нам эвслүүд, төрийн бус байгууллагын төсөөлөл, иргэдийн төлөөлөл, сэтгүүлчид, СЕХ-ныхон оролцох юм гэв.  

СЕХ-ны Хууль эрхзүйн хэлтсийн дарга Д.Бат-Эрдэнэ "Нийгэмд үүсээд байгаа, сонгуульд оролцож байгаа нэр дэвшигч, намуудын зүгээс гаргасан саналын дагуу 2615 санал тоолох төхөөрөмжийг нэг бүрчлэн баталгаажуулаад гэрчилгээ олгосон. Сонгуульд ашиглахаар бэлэн болсон. Саналын хуудас хэвлэх ажил дуусч бүх хэсгүүдэд тараагдсан. Энд цугласан нам, эвсэл нэр дэвшигчдийн төлөөллөөс аль хэсэг дээр санал явуулах вэ гэдгээ сонгоод, тийшээ хамт очиж санал хураалтаа хийж туршиж үзнэ. 

Тэр хүмүүсээр өөрсдөөр нь саналын хуудас дээр тэмдэглэгээг нь хийлгээд уншуулаад туршина. Буцаж СЕХ дээр ирээд СЕХ-ны төв серверт ирж байгаа мэдээлэлтэй нийцэж байна уу гэдгийг тулган шалгана" гэв. Энэ үеэр сэтгүүч асуулт асуусан юм. 

-Мөнгө тараасан асуудлууд бичлэгүүд байна. Нэр дэвшигч Ж.Батбаясгалан, Г.Гангамөрөн нарыг эргүүлэн татах уу. Төрийн эрхийг хууль бусаар авах гэмт хэрэгт яллагдах уу. Чингэлтэй дүүргийн Засаг дарга Батсүмбэрэл нарын 12 дарга нэг хаяг дээр нийтийн байранд амьдарч байгаа баримт байна. Энэ асуудал юу болоод байна вэ?

-Зөрчил шалган шийдвэрлэх хуулийн дагуу мөнгө, эд зүйл тараасан гэх асуудлыг цагдаагийн байгууллага шалгана. Гэм бурууг шүүх эцэслэн шийдвэрлэх ёстой. Шүүхийн шийдвэр гарсны дараа тухайн нэр дэвшигчийг эргүүлэн татах хуулийн заалттай. 

Нийтийн байранд нэг хаяганд олон хүн байгаа асуудал байна. Түүнтэй холбоотой асуудлыг УБЕГ хариуцаж байгаа. Тухайн байгууллага мэдээлэл өгөх байх. 

Хар машин хакердуулна гэж мөнгө төлсөн гэх асуудал нэр дэвшигчийг залилах шинжтэй үйлдэл ч байж болзошгүй. Мөн илт худал мэдээллийг олон түмэнд түгээсэн асуудлыг шалгаж өгөөч гэж ТЕГ-т хандсан. 

Энэ үеэр нийслэлийн МАХН-ын дарга Э.Эрдэнэжамьян "Сэтгүүлч та нарын асуултад СЕХ-ныхон ямар хариулт өгч байгааг харж байгаа биз. Яг адилхан сонгуулийн хууль зөрчиж байгаа олон зөрчил байгаа. Эрх баригч намтай холбоотой зөрчлүүдийг ярихаар бид мэдэхгүй, шүүх шийднэ гээд яаралтай дүгнэлт хийдэг. Хар машины өчигдрийн бичлэгтэй холбоотой Г.Гангамөрөн гэх мэт хүмүүсийн яриаг шүүх шийдэхгүй байна. Та нар шүүхэд яагаад өгөхгүй байгаа юм. Төрийн эрхийг хууль бусаар авахыг завдчихаад байна шүү дээ. Та нар тэр хүмүүсийг баривчлаад шалгаад асуух ёстой байтал энд ингээд жүжиг тоглох гээд сууж байна. Улс орон даяар хийдэг луйврыг чинь энд бид шалгаад суух хэрэг байна уу. Сэмжидмааг, Гангамөрөнг шалгасан уу" гэлээ. 

СЕХ-ны Хууль эрхзүйн хэлтсийн дарга Д.Бат-Эрдэнэ "СЕХ сонгууль зохион байгуулах ёстой байгууллага болохоос гэм хэрэг, зөрчил шалгадаг газар биш" гэлээ.