СЕХ-ноос орон нутгийн сонгуулийн бэлтгэл ажлын талаар мэдээлэл хийлээ.
СЕХ-ны дарга П.Дэлгэрнаран мэдээлэл хийлээ. Тэрбээр "Аймаг, нийслэл, сум, дүүрийн ИТХ-ын ээлжит сонгууль маргааш эхлэхэд бэлэн боллоо. Маргааш өглөө 07:00-20:00 цаг хүртэл санал хураалт үргэлжилнэ. Ээлжит сонгуулийн бэлтгэл ажлыг бүрэн хангалаа.
Улсын хэмжээнд 21400 төрийн албан хаагч бүх шатны сонгуулийн хэсэг, тойргийн хороодод ажиллаж байна. Коронавирус цар тахалтай холбогдсон журмыг баримталж бүх шатны сонгуулийг онцгой горимоор зохион байгуулна.
Нийт 2148 хэсгийн хороонд санал тоолох төхөөрөмжүүдийг хүргэж, ариутгал халдваргүйжүүлэлтийн бодис хүргэсэн. Аль болох ил тод, эмх цэгцтэй, шударга, хуулиийн хүрээнд сонгууль явуулахаар бэлтгэл ажлыг хангалаа. Санал хураалтын дүн, явц ирцийн мэдээллийг СЕХ, УБЕГ хамтран маргааш 12,15 цагуудаас та бүхэнд мэдээлнэ.
Санал хураалтын дараа гар тооллогыг 50 хувьд нь тоолохоор зөвлөмж чиглэл бүх хэсгийн хороодод хүргүүлсэн. Тухай хэсэгт байгаа ажиглагчдын саналаар ил тодоор тоолно. Эргэлзээ, нууж хаах зүйл байхгүй. Дүнг дэлгэцээр явуулах боломж тун хомс. 8000 мандат дээр 17000 гаруй нэр дэвшигч нэр дэвшиж байгаа. Өмнө нь ч дэлгэцээр гаргаж байгаагүй. Гэхдээ бид автоматжуулсан систем хэрэглэж байгаа учраас тодорхой зохион байгуулалтын арга хэмжээнүүд хийсэн. Маргааш оройноос нөгөөдөр өглөө хүртэл СЕХ-ны вэб сайтад орж бүх хэсгийн хороодын сонгуулийн дүнтэй танилцаж болно. Онцгой дэглэм үйлчилж байгаа энэ үед Засгийн газраас гаргасан журмыг баримтлаж ажиллана. Сонгуулийг эмх цэгц, дэг журамтай явуулах үүднээс цагдаа, тагнуул, онцгой байдал, төрийн тусгай албан хаагчид ажиллана.
Өнөөдөр саналын битүүмжилсэн хайрцгаар санал хураат авч эхэлсэн. 20:00 цаг хүртэл санал авна. Саналын хуудсыг бөглөх болон бусад мэдээллүүдийг хэвлэлүүдээр тогтмол мэдээлж байгаа. Иргэд, сонгогчиддоо хандаж уриалга гаргаж байна. Та бүхэн маргаашийнхаа сонгуульд идэвхитэй оролцоорой" гэв.
УБЕГ-ын дарга Д.Дэлгэрсайхан "УБЕГ хуульд заасан чиг үүргийн дагуу сонгогчдын нэрсийн жагсаалт үйлдэх, нягтлан шалгах, танилцуулах, хүргүүлэх ажлыг гүйцэтгэдэг. Сонгууль бүрт 70-90 ажилбар хийж гүйцэтгэдэг. Өнөөдрийн байдлаар бүх хэсгүүдэд сонгогчдын нэрсийн жагсаалт бүхий тоног төхөөрөмж хүргүүлсэн. Орон нутагт үндсэн сонгогч 11556000, түр хасав тэмдэглэгээтэй 36146, нийслэлд үндсэн сонгогч 914208, түр хасав тэмдэглэгээтэй 90048, нийт 2140764 сонгогч, түр хасав тэмдэглэгээтэй 126194 сонгогч бүртгэгдсэн байна" гэлээ.
2 сэтгэгдэлСэтгэгдэл бичих
Нэгэнт 50%ийг гараар тоолж байгаа юм бол бүгдийг тоолж, машинаа больчих. Тэгвэл хүмүүсийн эргэлзээ арилна.
bolgoe gewel boloxgvi ym gej baixgvi shte xeniig xuuraad baina