БАЙР СУУРЬ: Иргэд хотын шинэ удирдлага, төлөөлөгчдөд юу хэлэв

Аймаг, нийслэл, сум, дүүргийн ИТХ-ын сонгууль орон даяар болж өнгөрлөө. Улмаар нийслэлд МАН 34, АН 8, ХҮН 3 суудал авч, орон нутагт МАН 13, АН 8 суудал авч, МАН үнэмлэхүй ялалт байгуулав. 

Ялалт байгуулсан Нийслэлийн МАН-ын дарга Д.Сумъяабазар "Хотын шинэ даргыг тун удахгүй зарлаж, томилох болно. Мөн НИТХ-ын шинэ төлөөлөгчдийн хурлыг яаралтай хийнэ. Улс оронд хийж хэрэгжүүлэх ажил маш их байгаа учир ажилдаа шуурхайлан орно" гэсэн юм. 

Тэгвэл Хотын шинэ дарга болон НИТХ-ын шинэ төлөөлөгчдөөс иргэд ямар ажлыг нэн тэргүүнд хийж хэрэгжүүлэхийг хүсч байгаа талаарх байр суурийг нь сонслоо. 

Баянгол дүүргийн иргэн Б.Эрдэнэцэцэг: Санхүү, эдийн засаг, түгжрэл яриад байхаар хог мэтийн жижиг асуудлууд мартагдаад байна

-Одоогоор хэн, хаана сонгогдсон талаар мэдээлэл дутмаг байна. Нийслэлийн иргэдийн төлөөлөгчөөр сонгогдсон хүмүүс ард түмнийхээ төлөө маш сайн ажиллаасай гэж бодож байна. Миний хувьд залуучуудыг түлхүү сонгосон байх гэж бодож байна. Орчин үеийн залуусын мэдлэг боловсрол өндөр болсон. Тиймээс тэдгээр залуу боловсон хүчнийг хууль дүрмийн дагуу зөв чиглүүлж ажиллуулах хэрэгтэй байх. Мөн нийслэлчүүдэд тулгамдаад буй хог хаягдлын талаарх асуудлуудыг шийдвэрлээсэй. Хотын гудамж талбайд хаа сайгүй л хог байна. Хотоо цэвэрхэн байлгах хэрэгтэй. Тиймээс ажлын төлөвлөгөөгөө багаас нь эхлэх хэрэгтэй болов уу. Санхүү, эдийн засаг, хотын түгжрэл гэж ярьсаар нүдэнд үзэгдэх жижиг асуудлуудыг мартагдах тал ажиглагдаж байна.

Баянзүрх дүүргийн иргэн С.Гансүх: Монголчууд диваажинд амьдарч байгаагаа ойлгох хэрэгтэй

-Хөл хорио тогтоосон энэ хэцүү цаг үед шинээр сонгогдсон хүмүүс хуучин жишгийг сахиж, ажлаа сайн хийгээсэй гэж хүсч байна. Иргэдийн төлөөлөл болж сонгогдсон хүмүүс өөрсдийнхөө ажлыг сайн мэдэж байгаа байх. Монголчууд тэгтлээ модоо барьж, хоосорч ядуураагүй байна. Бүгд өөрсдийнхөө төлөө хөдөлмөрлөж сайхан амьдарч байгаа. Монголчууд диваажинд амьдарч байна. Дэлхийн бусад улс орны иргэдтэй өөрсдийгөө харьцуулж харах хэрэгтэй.

Сүхбаатар дүүргийн иргэн Н.Отгоо: Нам биш ард иргэдийнхээ төлөө ажиллах хэрэгтэй

-Шинэ хотын дарга, төлөөлөгчдөөс эхлээд гудамж талбайн гэрэлтүүлэг, замын түгжрэлийн асуудлыг шийдэж өгөөсэй гэж хүсч байна. Жишээлбэл, Сүхбаатар дүүргийн наймдугаар хороонд гэрэлтүүлэг маш муу байдаг. Хэдийгээр өнгөрсөн жилүүдийг бодвол энэ жил хамаагүй дээр байгаа ч бас л хэцүү байна. Иргэдийн төлөөлөл болж төрд сонгогдсон хүмүүс намынхаа ажлыг гүйцэтгэхээсээ илүү иргэдийг төлөөлж бидэнд хэрэгтэй хууль, дүрмийг боловсруулах хэрэгтэй байна. Аз жаргалтай Улаанбаатарыг бий болгох гэж хөдөлмөрлөх хэрэгтэй. Гэхдээ хараад байхад хотын удирдлагууд өөрсдийнхөө намыг л өөд нь татах ажлуудыг хийх юм. Тиймээс өөрсдийнхөө эрх, үүргээс нам гэдэг зүйлийг ангид байлгаж сурахыг  хүсэж байна.

Баянгол дүүргийн иргэн Ж.Чойжил : Замын түгжрэлийн асуудлыг хурдан шийдээсэй

-Өнгөрсөн сонгуулиудын талаар юу гэж хэлэхээ мэдэхгүй байна. Бид сонгоод л байдаг. Гэвч сонгогдсон хүмүүс сайн ажиллаж байгаа эсэх нь одоогоор харагдахгүй л байна. Ажлаа хийдэг хүмүүс байдаг л байх . Гэвч санаанд хүрдэг нь цөөхөн юм.  Нэн түрүүнд замын түгжрэлийн асуудлыг шийдэх хэрэгтэй байна. Сонгогдсон хүмүүс маань ирэх дөрвөн жилд ард иргэдийнхээ  нүдэнд  үзэгдэх ажил хийгээсэй.

-Баянгол дүүргийн иргэн: Төрийн түшээдэд улс орноо хөгжүүлэх сэтгэл дутаж байна

-Хотоо тохижуулж, иргэдийг уур бухимдлаас нь ангижруулах хэрэгтэй. Замын түгжрэлийг бууруулж, ахмад настнуудын хөнгөлөлттэй эмийн олголт зэрэг олон асуудлыг шийдвэрлээсэй. Хөгшин, залуу ялгаагүй бүгд замын түгжрэлээс болж бухимдаж байна. Шинээр сонгогдсон төрийн түшээд ард түмнийхээ төлөө ажлаа чин сэтгэлээсээ хийгээсэй. Сэтгэл байвал бүх юм болно. Ямар нэгэншалтаг, шалтгаан огт сонин биш. Ямарч ажлыг чин сэтгэлээсээ хийвэл ямар шалтаг шалтгааныг даваад л гарна. Улс орноо хөгжүүлье, хүмүүсийг аз жаргалтай байлгах сэтгэл байвал бүх юм болно, бүтнэ. Монголд сэтгэлтэй хүн л дутаж байна.  Манайд мөнгө, байгалийн баялаг гээд бүгд л  байна.

-Баянзүрх дүүргийн иргэн: Өөрсдийнхөө төлөө биш ард түмний төлөө ажиллавал улс хөгжинө

-Өөрсдийнхөө төлөө биш санал өгсөн сонгогчдынхоо төлөө ажиллаасай гэж бодож байна. Одоо сонгогчдынхоо төлөө ажилладаг хүн алга. Ард түмэн юуны тулд тэдэнд санал өгч байгаа билээ тэрийг ойлгох хэрэгтэй. Өнөөдрийн нийгэм бүхэлдээ өөрчлөгдөж, хүмүүсийн мөн чанар ч өөрчлөгдсөн байна. Дарга болохын төлөө л төрд сонгогдож байна. Өөрсдийнхөө төлөө биш иргэдийнхээ төлөө юм хийгээсэй. Яг юу хийнэ гэж сонгогдсон билээ дээ. Тэр амлалтаа биелүүлэх  хэрэгтэй. Нэр дэвшигчид мөрийн хөтөлбөр боловсруулсан байдаг. Тэнд хийхээр төлөвлөсөн ажил нь бодитойгоор хэрэгжсэн  юм байдаггүй. Харин өөрсдөдөө мөрийн хөтөлбөрөө 100 хувь хэрэгжсэн гэдэг үнэлгээ тавьдаг.

Сонгинохайрхан дүүргийн иргэн Ш.Сэржмядаг: Хүүхдүүдийн аюулгүй байдлыг хангасан ажлыг түлхүү хийх хэрэгтэй

-Шинээр сонгогдсон төлөөлөгчид үүргээ ухамсарлаж, амлалтаа биелүүлээсэй. Хотын түгжрэл, сургууль, цэцэрлэгийн хүрэлцээ, хүүхэд багачуудыг чөлөөт цагаа өнгөрүүлэх орчноор хангаж өгөөсэй. Бидний ирээдүй бол хүүхдүүд гэдгийг анхаарах хэрэгтэй. Зөвхөн эцэг, эхчүүдээс гадна шат шатны удирдлагууд хүүхдийн төлөө ажлуудыг сайн хийгээсэй. Мөн улсын сургууль, цэцэрлэгийн гадна, дотор орчныг сайжруулаасай. Хүүхдүүдийн орчинг аюулгүй байлгаж, бүрэн камержуулах хэрэгтэй. Өдөрт хэчнээн хүүхэд гэр бүлийн хүчирхийлэлд өртөж байгааг бид мэдэхгүй. 

Баянзүрх дүүргийн иргэн Б.Гансүх: Нийгмийн даатгал, халамжийн үйлчилгээг тэгш хуваарилахад анхаарах хэрэгтэй

-Ард түмний төлөөлөл болсон залуучуудыг "Сэтгэл санаагаа дайчилж, ард түмнийхээ төлөө чин сэтгэлээсээ ажиллаасай" хэмээн хүсч байна. Мөн хотын удирдлагууд түгжрэлийн асуудлыг хурдан хугацааанд шийдэх шаардлагатай байна. Тэр тусмаа халамж, тэтгэмжийн мөнгийг хяналттай тараадаг байгаасай. Нийгмийн эмзэг бүлэгт багтдаг иргэдэд төрийн хишиг хүрч чадахгүй байна. Ихэнх хүмүүс нийгмийн халамжийн үйлчилгээ хавтгайрсан хэмээн шүүмжилдэг ч авах ёстой эзэддээ хүрч чаддаггүй. Танил тал, арын хаалга ашиглаж халамж, тэтгэвэр, хүнсний талон авдаг хүмүүс маш олон байдаг.