Нэр хүнд, цар хүрээгээрээ Аваргуудын лигийн дараа орох Европа лигийн тэмцээний шинэ улирлын тоглолтууд өнгөрсөн шөнө эхэллээ. Энэ тэмцээнд Англиас "Арсенал", "Тоттенхэм", "Лестер" гэсэн хүчтэй багууд өрсөлдөж байгаа.
Тэгвэл өнгөрсөн шөнө "Арсенал" клуб Австрийн "Рапид Вена" багийн талбайд зочилж, 1:2-оор буулгаж авснаар В хэсгийн тэргүүнд бичигдэж эхлэв. Тоглолтын 51 дэх минутад эзэн багаас Фунтас гоолдож, тооны харьцааг нээсэн. Харин Давид Луиз 70 дахь минутад тэнцүүлсэн бол Обамеянг 74 дэх минутад хожлын гоол оруулсан байна.
"Тоттенхэм" клуб Австрийн "ЛАСК" багийг талбайдаа хүлээж авч, 3:0-ээр буулгаж авлаа. Тоглолтын 18 дахь минутад Лукас Моура тооны харьцааг нээсэн бол 27 дахь минутад зочин багийн хамгаалагч Андраде өөрийнхөө хаалганд нэгийг хийсэн. Тэгвэл Сон 84 дэх минутад гүйцээж, багийнхаа хожлыг баталгаажуулжээ. Ийнхүү Лондоны баг J хэсгийг тэргүүлж эхлэв.
"Лестер"-ийн хувьд Украины "Заря" клубыг талбайд хүлээж авч, 3:0-ээр хожив. Мэддисон 29, Барнс 45, Ихеаначо 67 дахь минутад нэг нэг гоол оруулсан. G хэсэгт Португалын "Брага" талбайдаа Грекийн "АЕК" багийг талбайдаа 3:0-ээр хожсон.
Европын лигийн онцлох тоглолтууд гэвэл Германы "Байер Леверкузен" клуб талбайдаа Францын "Ницца"-г 6:2-оор "бут ниргэв". Мөн Испанийн "Вильярреал" талбайдаа Туркийн "Сивасспор"-ыг 5:3-аар буулгаж авсан.
Сэтгэгдэл бичих