“Мөнх хаан” кино төсөл хэрэгжинэ

“Мөнх хаан” кино төсөл хэрэгжинэ Монголын кино урлагт өөрсдийн бүтээсэн “Говийн домог”, “Содура”-гаас эхлээд олон тодорхой туурвил, кононуудаараа үзэгчдийг байлдан дагуулсан “ UB пикчерс” кино компанийн уран бүтээлчид “Мөнх хаан” кино төсөл хэрэгжүүлэх болсоноо албан ёсоор зарлалаа.

Монголын эзэнт гүрний түүхэн их хаан Мөнхийн амьдрал, эн замналын тухай эл киноны зохиол нэгэнт бэлэн болсон бөгөөд найруулагчид зохиол дээрээ ажиллаад эхэлжээ. Түүхэн туульсын , уран сайхны бүрэн хэмжээний эл бүтээлийг гадаад дотоодын өргөн олон үзэгчдэд үнэмлэхүй зориулан бүтээх бөгөөд кино найруулагчид, продюссэрүүд, кино жүжигчид өргөн далайцтай ажиллах онцгой томоохон төсөл ажээ. Мөнх хааны үйл хэрэг бол Монголын эзэнт гүрний мандан бадарсан яруу өргөн түүхийг хамрах бөгөөд киноны зураг авалт энэ агуулгаараа үлэмж цараатай явагдах агаад төсөл хэрэгжүүлэгчид бүх талаар судалгаагаа нарийвчлан хийж, хийсээр ч буй ажээ. Монголын түүх бол дэлхийн түүх байдаг. Энэ түүхийн үнэнийг зарим талаар гуйвуулах, өөрчлөх , бусад олон хэлбэрээр үнэнээс ангидад хандуулах явдал багагүй болсон энэ цагт монгол уран бүтээлчид , тэр тусмаа UBS телевизийн ерөнхий захирал, Урлагийн гавьяат зүтгэлтэн Л.Балхжаваар тэргүүлүүлсэн энэ багийнханы зорилго бахархалтай бөгөөд төслийн үндсэн бүтээгдэхүүн болох “Мөнх хаан” кино зохиолыг Соёлын гавьяат зүтгэлтэн, зохиолч Ү.Хүрэлбаатар, Батсүх, Соёлын гавьяат зүтгэлтэн, жүжгийн зохиолч Ш.Гүрбазар, МЗЭ-ийн шагналт зохиолч Б.Золбаяр нар хамтран туурвижээ.