“Хотулун гүнж” Berlinale-аас Венецэд уригдлаа

Шүүдэр продакшн, VOO-н хамтын бүтээл Хотулун гүнж түүхэн тулаант УСК 72 дахь Berlinale фестивалийн кино захад амжилттай оролцож олон дистрибьютерээс санал авчээ. Berlinale нь дэлхийн А зэрэглэлийн хамгийн том 3 кино наадмын нэг бөгөөд энэ удаа дэлхийн 50 гаруй орны худалдаанд 566 кино оролцсоны дотор Хотулун гүнж ганц монгол кино байв.

“Хотулун гүнж” Berlinale-н кино захад 2.11-нд online-аар нээлтээ хийж, кино худалдааны ангилалд 3 удаа үзүүлж, дэлхийн 3 том кино наадмын нэг Венецийн фестивалиас урилга авчээ. Берлинд “Хотулун гүнж” киноны төлөөлөгчөөр Монголын соёлын элч, мисс О.Оюунтуяа ажиллажээ. Берлиналь наадмын албан ёсны хөтөлбөр 2-р сарын 1-нд батлагдаж, виртуаль самбар идэвхмэгц “Хотулун гүнж”-ийг сонирхсон эхний дисрибьютерүүд холбогдож эхэлсэн бөгөөд, Герман дахь нэгэн компанитай эхний гэрээгээ үзэглэхэд бэлэн болжээ.

Тулаант төрлийн энэхүү кинонд Булганы дархан цаазат Хөгнө хан хайрхан, Өвөрхангайн Элсэн тасархай, Хунгийн нуур, Хэнтийн Баян-Адарга, монгол гранд каньон гэгддэг Дундговийн Цагаан суварга, Төв аймгийн Эрдэнэ сумын үзэсгэлэнт газрууд орсон нь гадаадынханд Монголын байгалийн үзэсгэлэнг толилуулсан сурталчилгаа болж буй ажээ. Мөн “Хотулун гүнж” киноны зураачийн ажил, хувцас хэрэглэлийг гадаадын киноныхон ихэд үнэлж байгаа бөгөөд, Берлиналийн 3 удаагийн үзлэгт нь фонтастик ба түүхэн төрлийн киноны  олон улсын 10 гаруй фестивалийн төлөөлөгчид оролцсоныг тайланд нь дурдсан байна.

Ийнхүү Марко Пологийн тэмдэглэл, Судрын чуулганд тэмдэглэгдэж, Турандот дуурийн гол дүрд мөнхөрсөн, Чингис хааны 5 дахь үеийн гүнжийн тухай монгол кино олон улсны үзэгчдийн хүртээл болох цаг ирж байна. Дашрамд дурдахад, Шүүдэр продакшны өмнөх бүтээл “Ану хатан” УСК нь Warrior Princess нэрээр Lion’s Gate –д зарагдан олон улсад хөл тавьж байжээ.

“Хотулун гүнж” кино 3-р сарын 1-нээс VOO Cinema-гаар гарч эхлэх ажээ.