Хүүхдийг Ивээх Сан нь “Монгол Улсад хүүхэд хамгааллын тогтолцоог бэхжүүлэх нь” төслийг (2018-2023 он) Японы Олон улсын хамтын ажиллагааны байгууллага (ЖАЙКА)-гийн санхүүжилттэйгээр Гэр бүл, хүүхэд, залуучуудын хөгжлийн газар, Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн ажлын албатай хамтран хэрэгжүүлж байгаа юм.
Энэхүү төсөл нь орон нутаг дахь анхан шатны нэгж болох хүүхэд хамгааллын хамтарсан багуудыг чадавхжуулж, олон нийтийн хүүхэд хамгааллын талаарх ойлголтыг нэмэгдүүлснээр хүүхэд хамгааллын тогтолцоог бэхжүүлж, үйлчилгээг сайжруулах зорилготой юм.
Хүүхдийг хүчирхийлэл, дарамт, үл хайхрал болон мөлжлөгөөс хамгаалах, урьдчилан сэргийлэх хууль эрх зүйн орчинг бүрдүүлснээр төрийн байгууллагын хүүхэд хамгааллын үйлчилгээ бэхжиж, сонгогдсон зорилтот орон нутаг дахь анхан шатны нэгжийн (хүүхэд хамгааллын хамтарсан багийн) хүүхэд хамгааллын үйлчилгээний механизм бүрдэж, олон нийтийн хүүхэд хамгааллын талаарх ойлголт нэмэгдэх юм.
Төслийн үйл ажиллагаа:
- Хүүхэд хамгааллын хамтарсан багийн гишүүдийн чадавхыг бэхжүүлэх
- Хүүхэд хамгааллын хамтарсан багийн гишүүдийн болон салбар дундын байгууллагуудын уялдаа холбоог сайжруулах
- Олон нийтийн дунд хүүхэд хамгааллын талаарх ойлголт, мэдлэгийг нэмэгдүүлэх
- Төслийн сургамж, амжилтыг нэгтгэн, холбогдох төрийн байгууллагуудад танилцуулах, нөлөөлөх
Төслийн зорилтот хороодын хамтарсан баг:
- Улаанбаатар хотын Баянзүрх дүүргийн 9, 23, 27-р хороо
- Улаанбаатар хотын Сонгинохайрхан дүүргийн 2, 10,11-р хороо,
- Улаанбаатар хотын Чингэлтэй дүүргийн 9, 10, 13-р хороо,
- Архангай аймгийн Эрдэнэбулган сумын 4-р баг, Батцэнгэл, Чулуут, Хайрхан сум
- Дорнод аймгийн Хэрлэн сумын 1-р баг, Баян-Уул, Халх гол сум
2022 оны амжилт, үр дүн
- "Хүүхэд хамгаалал ба хамтарсан баг" сэдвээр хамтарсан багийн үндсэн ойлголт өгөх сургалтыг явуулах сургагч багшаар сургагч багш бэлтгэлээ. Эдгээр сургагч багш нар хамтарсан багийн 123 гишүүнд сургалт зохион байгуулав.
- Төслийн хүрээнд боловсруулсан арга зүй хөтөлбөрөөр Гэр бүл, хүүхэд, залуучуудын хөгжлийн газраас сургагч багшийн сургалт болоод орон нутгийн бүсчилсэн сургалтыг зохион байгуулав. Тус сургалтаар 170 сургагч багш бэлтгэж, орон даяар 3,600 орчим хамтарсан багийн гишүүдийг сургалаа.
- "Хамгааллын алхмууд буюу кейс менежмент" сургалтын хөтөлбөрт 20 сургагч багш, хамтарсан багийн 80 гишүүн хамрагдаж, олон улсын түвшний хүүхэд хамгааллын арга зүйд суралцлаа.
- Хүмүүжлийн эерэг аргын үндэсний сургагч багшаар 5 хүн, чиглүүлэгчээр нийт 24 мэргэжилтэн бэлтгэгдлээ. Архангай, Дорнод аймаг болон Улаанбаатар хотод 196 эцэг, эх хүүхдээ хүмүүжүүлэх эерэг арга барилд суралцаж төгслөө.
- "Хүүхдийг зодож шийтгэхийн эсрэг өдөр"-ийн нөлөөллийн арга хэмжээг зорилтот 16 сум, баг, хорооны хамтарсан багтай хамтран зохион байгуулав. “Хүүхдэдээ бахархан дуурайх хүн нь байя!” уриан дор тэмдэглэсэн уг арга хэмжээ нь нийт 7.000 гаруй хүүхэд , 6.0000 гаруй иргэдэд хүрчээ.
- Байгууллагуудын багш, ажилтнуудыг чадавхжуулах уулзалт, сургалт, арга зүйн зөвлөгөөнд 206 багш, ажилтан хамрагдаж, хүүхдийн аюулгүй байдлыг хангах бодлогыг батлав.
- "Нийгэмшүүлэх цирк" сургалтад 7-19 насны 136 хүүхэд хамрагдлаа.
Сэтгэгдэл бичих