Тажикстан улс Риогийн Олимпийн наадамд 7 тамирчинтай ирээд ганц ч медаль хүртэж чадаагүй байсан. Тэгвэл хамгийн сүүлд хөнгөн атлетикийн дүүгүүр шидэлтийн төрөлд өрсөлдсөн Д.Назаров эх орондоо Риогийн Олимпийн анхны болон эцсийн алтан медалийг авчирлаа.
Тэрбээр шигшээ тэмцээнд Лондонгийн Олимпийн аварга Унгарын К.Парш, Олимпийн мөнгө, хүрэл медальт Беларус улсын 40 настай ахмад тамирчин И.Цихан, 2015 оны Дэлхийн аваргын хүрэл медальт Польшийн В.Новицкий тэргүүтэй 12 шилдэг тамирчин өрсөлдсөн. Эдгээр тамирчдаас Тажик залуу 5 дахь гүйцэтгэлээрээ 78.68 м шидсэн. Энэ үзүүлэлт нь түүнийг Олимпийн аварга болгоход хангалттай байсан юм. Беларус улсын И.Цихан 5 дахь гүйцэтгэлээрээ 77.79 м шидэж, 6 дахь оролдлогийг гүйцэтгэсэн ч өмнөх амжилтаа ахиулж чадаагүй. Ингээд Тажикстан улсын Д.Назаров 4 дэх Олимпийн наадамдаа оролцсоны эцэст Олимпийн алтан медалийг хүртлээ. Д.Назаров Лондонгийн Олимпийн наадамд 8-р байр, Бээжингийн Олимпийн наадамд 12-р байр тус тус шалгарч байсан. Мөн тэрээр 2004 оны Афины Олимпийн наадамд оролцож байжээ.
Дүүгүүр шидэлтийн медалийн эзэд:
- Алт: Д.Назаров (Тажикстан) – 78.68 метр
- Мөнгө: И.Цихан (Беларус) – 77.79 метр
- Хүрэл: В.Новицки (Польш) – 77.73 метр
Д.Назаров 2015 оны ДАШТ-нд мөнгөн медаль хүртэж байсан туршлагатай. Тэгвэл Беларус улсын ахмад тамирчин И.Цихан Олимпийн хошой медальтан болж байна. Тэрбээр 2008 оны Бээжингийн Олимпийн наадмын дүүгүүр шидэлтийн төрөлд хүрэл медаль хүртэж байсан бөгөөд мөн ДАШТ-ээс 2003, 2007 онд алтан медаль хүртэж байсан. Харин Польш залуу В.Новицки 2015 оны ДАШТ-ний хүрэл медалиа Олимпийн хүрлээр ихэрлүүллээ.
Ssport.mn
1 сэтгэгдэлСэтгэгдэл бичих
ТЭРЭЭР ШИГШЭЭ ТЭМЦЭЭНД..............ТЭРГҮҮТЭЙ 12 ТАМИРЧИНТАЙ ӨРСӨЛДСӨН ГЭЖ БАЙМААР ЮМ. ГЭТЭЛ.....