Н.Энхбаяр Цэцэд хандаж, Э.Баттөрийг хорьсон долоо хоног

Өнгөрч буй долоо хоногт улс оронд өрнөсөн онцлох үйл явдлыг тоймлон хүргэж байна. 

Үндсэн хуулийн өдөр тохиолоо

Ардчилсан шинэ Үндсэн хуулийг баталсан өдөр энэ сарын 13-нд тохисон билээ. Энэ өдөр эрдэм шинжилгээний бага хурал зохион байгуулсан. Мөн Гавьяат хуульч Б.Чимидийн нэрэмжит шагналыг хуульч Ж.Амарсанаа хүртсэн гэх мэт олон үйл явдал болсон билээ. Түүний нэг нь  Монгол Улсын Үндсэн хуульд оруулсан нэмэлт, өөрчлөлтийн эхийн хувийг Үндсэн хуулийн цэцэд залах ёслол байлаа.  Ёслолд  Улсын Их Хурлын дарга Г.Занданшатар,  Үндсэн хуулийн цэцийн дарга Н.Чинбат, Улсын Их Хурлын гишүүн Д.Тогтохсүрэн, Үндсэн хуулийн цэцийн гишүүд болон албаны бусад хүмүүс оролцсон юм. Ёслолын эхэнд Монгол Улсын Үндсэн хуульд оруулсан нэмэлт, өөрчлөлтийн эхийн хувийг Үндсэн хуулийн цэцэд залж буйтай холбогдуулан Монгол Улсын Их Хурлын дарга Г.Занданшатар үг хэллээ.

Тэрбээр, хэлсэн үгэндээ, “Үндсэн хуульдаа нэмэлт, өөрчлөлт оруулах санал, санаачилга сүүлийн 10 гаруй жил идэвхтэй өрнөсөн. Энэ удаагийн Улсын Их Хурал энэхүү үйл хэргийг 3 жилийн турш өрнүүлж, 5 сарын турш тасралтгүй хэлэлцсэн. Монголын ард түмэн, улс төрийн намууд, олон нийтийн байгууллагууд, эрдэмтэ,н судлаачид гээд нийт нийгмийн өргөн төлөөллийг хамарсан уулзалт, ярилцлага, танилцуулга, хэлэлцүүлгийг зохион байгуулж, санал нэг бүрийг нухацтай авч үзлээ" хэмээсэн юм. 

Элчин сайд А.Баттөрийг 30 хоног хорихоор боллоо

АТГ-аас энэ сарын 13-ны өдөр Элчин сайд А.Баттөрийг баривчлан саатуулсан билээ.  Түүнийг 2019 оны  арванхоёрдугаар сард гадаад улсад суугаа Элчин сайд нарын цугларалтад ирээд байхад нь хуулийн байгууллагаас хилийн хориг тавьсан юм. АТГ-аас А.Баттөрийг визний хураамжийн мөнгийг гэр бүлийнхээ гишүүдээр дамжуулан авсан гэх хэрэгт холбогдуулан шалгасан байсан билээ.  Тэгвэл энэ сарын 14-ий өдөр Сүхбаатар дүүргийн Эрүүгийн хэргийн анхан шатны шүүхэд Б.Баттөрд холбогдох хэргийн цагдан хорих таслан сэргийлэх шүүх хурал болсон байна. Шүүхээс А.Баттөрийг 30 хоногийн хугацаатай цагдан хорих шийдвэр гаргасан юм.  

Цахим хуудсаа Сонгуулийн хороонд бүртгүүлээгүй бол Зөрчлийн хуулиар хариуцлага тооцно

Сонгуулийн Ерөнхий хорооноос энэ сарын 15-ны өдөр мэдээлэл хийж, сонгуулийн хугацааг товлох, санал авах өдрийн тогтоох саналаа УИХ-д хүргүүлсэн гэдгээ мэдэгдсэн юм.  Мөн нийт саналын 50 хувийг хянан тоолох зохицуулалт хуульд тусгасныг ч тайлбарлав. Мэдээллийн үеэр СЕХ-ны дарга Ч.Содномцэрэн "Хуулиараа, СЕХ нь тойрог, мандатыг хуваарилах боломжгүй. УИХ-ын бүрэн эрхийн асуудал учраас хоёрдугаар сарын 1-нээс өмнө УИХ-ын Төрийн байгуулалтын байнгын хороо санал, дүгнэлтээ гаргаж, УИХ-ын чуулганы нэгдсэн хуралдаанаар эцэслэн шийднэ” хэмээсэн. 

УИХ-аас баталсан Сонгуулийн тухай хуульд тухайн нэр дэвшигчийг СЕХ-нд бүртгэхээс татгалзах үндэслэл болон цахим орчинтой холбоотой зохицуулалтыг тусгасныг СЕХ-ны Ажлын албаны дарга Д.Баяндүүрэн танилцууллаа. Тодруулбал, сонгуулийн жил эхэлснээс хойш хууль тогтоомж зөрчсөн нь хуулийн байгууллагаар тогтоогдвол тухайн нэр дэвшигчийг СЕХ бүртгэхээс татгалзах юм. Мөн сонгуулийн сурталчилгаа хийхдээ, нам болон нэр дэвшигчийн цахим хуудас, олон нийтийн цахим сүлжээн дэх хуудас, мэдээллийн сайтаар дамжуулах талаар зохицуулжээ. Ингэхдээ, нэр дэвшигч нам болон өөрийн албан ёсны цахим хуудас, олон нийтийн сүлжээн дэх хуудсаа аймаг, нийслэлийнхээ Сонгуулийн хороонд бүртгүүлэх аж. “Хэрвээ цахим хуудсаа Сонгуулийн хороонд бүртгүүлээгүй бол Зөрчлийн хуулиар хариуцлага тооцно” хэмээн тэрбээр анхааруулсан юм.  

Н.Энхбаяр Үндсэн хуулийн Цэцэд хандлаа 

МАХН-ын дарга Н.Энхбаяр Үндсэн хуулийн Цэцэд хандсан нь өнгөрсөн долоо хоногийн гол үйл явдлын нэг байлаа. Тэрбээр Цэцэд хандсан нь 2020 оны УИХ-ын Сонгуулийн тухай хуулийн зургаадугаар бүлгийн 29 дүгээр зүйлийн 29.8-т "Авлига, албан тушаалын гэмт хэрэг үйлдсэн нь шүүхээр тогтоогдсон бол нэр дэвшихийг хориглоно" гэсэн заалтыг тусгаж баталсантай холбоотой байсан юм.   Дээрх заалт нь МАХН-ын дарга Н.Энхбаярын нэр дэвших эрхийг хязгаарласан юм.

Үндсэн хуулийн Цэц 2008 оны сонгуулийн өмнө дээрхтэй адил маргааныг хэлэлцээд, УИХ-ын эсрэг шийдвэр гаргаж байв. Энэ удаад эрх баригч нам Үндсэн хуулийн Цэц хориглосон шийдвэрийг Сонгуулийн хуульд оруулж баталсан нь Н.Энхбаярыг  Цэцэд хандахад хүргэсэн юм. 

УИХ-ын гишүүн Н.Номтойбаярын бүрэн эрхийг цуцлах асуудлыг ирэх долоо хоногт хэлэлцэнэ

УИХ-ын Халдашгүй байдлын дэд хороо өчигдөр /2020.01.17/ УИХ-ын гишүүн Н.Номтойбаярын бүрэн эрхийг цуцлах эсэх асуудлаар хаалттай хуралдаж эхэлсэн ч хуралдаан ирэх долоо хоног хүртэл хойшиллоо. Учир нь УИХ-ын Халдашгүй дэд хорооны гишүүн Д.Лүндээжанцан, Ч.Улаан нар гадаадад томилолттой яваа аж. Халдашгүй байдлын дэд хороог УИХ-ын гишүүн Ц.Нямдорж даргалдаг бөгөөд парламентад хамгийн олон удаа сонгогдсон гишүүд болох Д.Лүндээжанцан, Ч.Улаан, Ө.Энхтүвшин, Н.Энхболд нар гишүүнээр ажилладаг билээ.

Холбогдох хуулийн дагуу Прокурорын хүсэлтийг УИХ 48 цагийн дотор хүлээн авах эсэхээ шийдвэрлэх ёстой. Харин Ц.Нямдорж сайд энэ талаар хэлэхдээ “ 48 цагийн дотор хэлэлцэх хуулийн хугацаа ийм бодитой шалтгааны улмаас зөрчигдөж байна. Нэгээс хоёр гишүүн байхгүй бол Халдашгүй байдлын дэд хороо хуралдах боломжгүй гэдгийг Улсын ерөнхий прокурор мэдээгүйгээс энэ асуудлыг оруулж ирсэн байна” гэлээ.