Хаврын чуулган завсарлаж, С.Баярцогт, Э.Бат-Үүл нар намдаа эргэн ирлээ

    Өнгөрч буй долоо хоног улстөрийн халуухан үйл явдлууд болж өрнөлөө. Тодруулбал, хаврын чуулган хаалтаа хийж, намууд өнөөдөр УИХ-ын сонгуульд өрсөлдөх нэр дэвшигчдээ тодруулах юм. 

Мөн АН-ын лидер болох С.Баярцогт, Э.Бат-Үүл нар намдаа буцан элссэн бол УИХ-ын гишүүн С.Жавхлан АН-д элслээ. Харин Үндэсний аудитын газраас бие даан нэр дэвшихээр мөрийн хөтөлбөрөө өгсөн 121 бие даагчийн мөрийн хөтөлбөрийг шаардлага хангаагүй хэмээн буцаав. Түүнчлэн Монгол Улсын Ерөнхийлөгч асан Ц.Элбэгдорж прокурорын байгууллагаас таслан сэргийлэх арга хэмжээ авсан юм. 

Харин дэлхий дахинд тархаад буй коронавирусийн халдвар 56-аар нэмэгдэж, батлагдсан тохиолдол 98, үүнээс 20 хүн нь эдгэрээд байна.

Ингээд өнгөрч буй долоо хоногт болсон үйл явдлыг тоймлон хүргэж байна.

121 бие даагчийн мөрийн хөтөлбөрийг буцаажээ

УИХ-ын ээлжит сонгуульд бие даан нэр дэвшихээр 208 иргэн Үндэсний аудитын газарт мөрийн хөтөлбөрөө хүргүүлээд байгаа. Эдгээрээс 121 иргэний мөрийн хөтөлбөрт Монгол Улсын Их Хурлын сонгуулийн тухай хуулийн 38 дугаар зүйлийн 38.9-д заасны дагуу шаардлага хангаагүй гэсэн дүгнэлт гарган, буцаажээ. 

 Нэр дэвшихээр горилогчид буцаагдсан мөрийн хөтөлбөрөө засаад тавдугаар сарын 14-ний дотор ҮАГ-т дахин хүргүүлэх боломжтой юм. ҮАГ бие даан нэр дэвшигчдийн мөрийн хөтөлбөрийг хянаж 2020 оны тавдугаар сарын 21-ний өдрийн дотор дүгнэлтээ гарган Сонгуулийн Ерөнхий Хороонд хүргүүлнэ.

С.Жавхлан АН-д элсэж, С.Баярцогт, Э.Бат-Үүл, Г.Уянга нар гишүүнчлэлээ сэргээж, ҮБХ-ны гишүүнээр батламжлагдлаа

Өнгөрсөн долоо хоногт УИХ-ын гишүүн О.Баасанхүү АН-д элссэн бол энэ долоо хоногт С.Жавхлан АН-д элслээ. Тэрбээр "Сөрөг хүчнийхээ ажлыг би хангалттай сайн гэж хувьдаа дүгнэж байгаа. С.Жавхлангийн гаргасан сонголт болгон мэргэн байдаг. Би өөрийнхөө гаргасан сонголт болгонд итгэлтэй байдаг. Ганцаараа явсан С.Жавхлан маш олуулаа болж байна. Миний үзэл баримтлал түгэн дэлгэрэх боломж бүрдэж байна" гэсэн юм. 

Мөн АН-аас хөөгдсөн болон намаасаа гараад байсан С.Баярцогт, Э.Бат-Үүл нар намдаа буцан элсээд байна. Тодруулбал, 2020 оны УИХ-ын сонгуульд бие дааж нэр дэвшихээ илэрхийлж байсан Хотын дарга асан Э.Бат-Үүл, Ерөнхийлөгчийн зөвлөх гишүүн асан Г.Уянга, Сангийн сайд асан С.Баярцогт нар АН-ын гишүүнчлэлээ сэргээж, ҮБХ-ны гишүүн болсон юм. 

Ерөнхийлөгч асан Ц.Элбэгдоржид хилийн хориг тавьж, нэр бүхий 13 яллагдагчтай уулзахыг хориглов

  Монгол Улсын Ерөнхийлөгч асан Ц.Элбэгдоржийн гэрээр тусгаарлагдах хугацаа дууссан. Улмаар Нийслэлийн прокурорын газраас яллагдагч Ц.Элбэгдоржийг Монгол Улсын хилээр гарахыг хязгаарлах хязгаарлалт тогтоолгох таслан сэргийлэх арга хэмжээ авахуулах, эрүүгийн хэргийн яллагдагч нар болох нэр бүхий 14 хүнтэй уулзахыг хориглох хязгаарлалт тогтоох таслан сэргийлэх арга хэмжээ авахуулах санал ирүүлсэнийг Сүхбаатар дүүргийн Эрүүгийн хэргийн анхан шатны шүүх хүлээн авч хяналаа.

Улмаар яллагдагч Ц.Элбэгдоржид нэр бүхий 13 яллагдагчтай уулзахыг хориглох, Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авсан шүүгчийн захирамж гаргасан байна. 

Чуулган завсарлалаа

Улсын Их Хурлын хаврын ээлжит чуулган 30 өдөр үргэлжилж, чуулганы нэгдсэн болон Байнгын хорооны хуралдаан 71 удаа, Түр хороо 2 удаа хуралдаж, 124 хууль тогтоомж хэлэлцэн баталсан байна. Хорио цээр, хязгаарлалтын нөхцөлд дунджаар 66 хувийн ирцтэйгээр хуралдаандаа оролцож, богино хугацаанд өндөр бүтээмжтэй ажилласныг Улсын Их Хурлын дарга онцлон тэмдэглэв. Түүнчлэн Үндсэн хуульд оруулсан нэмэлт, өөрчлөлтийн үзэл санааг “амилуулах” чиглэлээр Улсын Их Хурлын тухай, Улсын Их Хурлын чуулганы хуралдааны дэгийн тухай, Монгол Улсын Засгийн газрын тухай, Хөгжлийн бодлого, төлөвлөлт, түүний удирдлагын тухай, Төрийн аудитын тухай хуулиуд болон Монгол Улсын урт хугацааны хөгжлийн үзэл баримтлал “Алсын хараа-2050” хөтөлбөр зэрэг томоохон хууль, тогтоол баталсныг онцлон нэрлэлээ.

Улмаар 2016 оны Улсын Их Хурлын ээлжит сонгуулийн үр дүнгээр байгуулагдсан 7 дахь удаагийн парламент хууль тогтоох, хянан шалгах хуулиар хүлээсэн чиг үүргээ амжилттай хэрэгжүүллээ. Өнгөрсөн 4 жилд ээлжит болон ээлжит бус 11 чуулган чуулж, нийт 1400 шахам хууль тогтоомж батлав. Энэ удаагийн Улсын Их Хурал батлан гаргасан хууль тогтоомжийн тооноос гадна чанарын үзүүлэлтээр амжилт тогтоосон, бүтээлч парламент байлаа хэмээн Улсын Их Хурлын дарга онцлон тэмдэглэсэн юм. 

Б.Махбалд 13 жилийн хорих ял оноов

Нийслэлийн прокурорын газраас Б.Махбалд холбогдуулан яллах дүгнэлт үйлдэж ирүүлсэн эрүүгийн хэргийг Сүхбаатар дүүргийн Эрүүгийн хэргийн анхан шатны шүүх хэлэлцээд шүүгдэгч Б.Махбалд Эрүүгийн хуулийн тусгай ангийн 10.1 дүгээр зүйлийн 2 дах хэсгийн 2.1-д заасан гэмт хэрэг үйлдсэн гэм буруутайд тооцож 13 жилийн хугацаагаар хорих ялыг хаалттай хорих байгууллагад эдлүүлэхээр шийдвэрлэсэн юм. 

Хэргийг сануулбал, Зам, тээврийн хөгжлийн яамны байранд 2018 оны наймдугаар сарын 9-ний өдөр хүн амины хэрэг гарч, ЗТХЯ-ны Хяналт шинжилгээ, үнэлгээ, дотоод аудитын газрын дарга Т.Гомбосүрэн амь насаа алдсан байдаг.

Коронавирусийн халдварын батлагдсан тохиолдол 98 боллоо

Монгол Улсын хувьд коронавирусийн халдварын батлагдсан тохиолдол огцом нэмэгдэж 98 болсон. Учир нь өнгөрсөн лхагва гаригт ОХУ-аас 346 оюутныг эх оронд нь авч ирсэн. Харин эдгээр оюутны 55 оюутнаас коронавирусийн халдвар илэрсэн юм. 

Батлагдсан 98 тохиолдлоос 20 нь эдгэрэн гараад байгаа талаар ХӨСҮТ-ийн дарга Д.Нямхүү мэдээлсэн билээ. 

Мөн чартер нислэгээр Истанбулаас 179 иргэн, Алтанбулагийн боомтоор ОХУ-аас 400-гаад иргэн ирэн тусгаарлагдаад байгаа юм.